2028 онд үйлдвэрлэлд орох боломжтой шинэ төхөөрөмж
OpenAI өөрийн гэсэн ухаалаг гар утас бүтээхээр ажиллаж байгаа гэх мэдээлэл гарчээ. Энэхүү төхөөрөмж нь мобайл төхөөрөмж ашиглах өнөөгийн хэв маягийг үндсээр нь өөрчилж магадгүй гэж шинжээчид үзэж байна.
Шинжээч Мин-Чи Куогийн мэдээлснээр, уг AI смартфоны бөөн үйлдвэрлэлийг 2028 онд эхлүүлэхээр төлөвлөж байгаа аж. Төхөөрөмжийн гол онцлог нь шууд гар утсан дээр ажиллах бүрэн хэмжээний хиймэл оюуны агент байх юм.
Зарим нарийн төвөгтэй даалгаврыг үүлэн технологиор боловсруулж болох ч үндсэн функцууд төхөөрөмж дээрээ локал байдлаар ажиллах төлөвтэй байна. Ингэснээр хэрэглэгчийн өдөр тутмын үйлдэл, команд, мэдээлэл боловсруулах ажиллагаа илүү хурдан бөгөөд уян хатан болох боломжтой.
Үүний тулд OpenAI Qualcomm болон MediaTek-тэй хамтран өөрийн чипийг хөгжүүлж байгаа гэж мэдээлжээ. Харин төхөөрөмжийн дизайн болон үйлдвэрлэлийг Luxshare хариуцах төлөвтэй байна.
Аппликейшнээс татгалзсан шинэ интерфейстэй байж магадгүй
OpenAI-ийн смартфоны хамгийн сонирхол татаж буй хэсэг нь түүний интерфейс юм. Урьдчилсан мэдээллээр, уг төхөөрөмж уламжлалт аппликейшн төвтэй хэрэглээнээс татгалзаж магадгүй байна.
Үүний оронд хэрэглэгчдэд “даалгаврын урсгал” хэлбэрийн шинэ зохион байгуулалт санал болгох аж. Өөрөөр хэлбэл, хэрэглэгчийн хийж буй бүх үйлдэл, хүсэлт, ажлын явц болон төлөв үндсэн дэлгэц дээр нэгтгэн харагдах боломжтой байж магадгүй юм.
Өмнө нь OpenAI-ийн тэргүүн Сэм Альтман болон Apple-ийн домогт дизайнер асан Жони Айв нар хиймэл оюунд суурилсан бүхэл бүтэн төхөөрөмжийн экосистем бүтээхээр ажиллаж байгаа тухай мэдээлж байсан. Зөвхөн смартфоноор хязгаарлагдахгүй, ухаалаг чихэвч, чанга яригч болон бусад AI гаджетуудыг ч мөн авч үзэж байгаа ажээ.
Ийнхүү ChatGPT-ийн ард буй компани Apple, Samsung зэрэг уламжлалт технологийн аваргуудтай өрсөлдөх шинэ ангиллын төхөөрөмж бэлтгэж байж болзошгүй байна. Хэрэв уг төсөл хэрэгжвэл ухаалаг гар утас зөвхөн апп ажиллуулдаг төхөөрөмж бус, хэрэглэгчийн өмнөөс даалгавар зохион байгуулж, гүйцэтгэдэг хувийн AI туслах болж хувирах боломжтой юм.
