Arctic Fox Technologies компани компьютерын ердийн хулганын ойлголтыг өөрчлөх Super Mouse төхөөрөмжөө Kickstarter дээр танилцуулжээ. Шинэ бүтээгдэхүүний хамгийн содон хэсэг нь их биеийн дээд талд, хэрэглэгчийн алганы доор байрлах 3.1 инчийн HD мэдрэгчтэй дэлгэц юм.
Том хэмжээний дэлгэц суурилуулснаар Super Mouse харьцангуй өнцөглөг хийцтэй болж, үндсэн товчлуурууд нь ердийн хулганаас жижиг хэмжээтэй болсон байна. Гэхдээ үйлдвэрлэгч уг төхөөрөмжийг зөвхөн курсор удирдах хулгана бус, нэмэлт тачпад болон макропадыг орлох олон үйлдэлт хэрэгсэл хэмээн тодорхойлжээ.
Дэлгэц дээр 16 хүртэлх товчлол байрлуулна
Super Mouse-ийн мэдрэгчтэй дэлгэц дээр хэрэглэгч 16 хүртэлх shortcut, виртуал товчлуур эсвэл макро команд байрлуулах боломжтой.
Дэлгэцийн интерфейс нь тухайн үед ашиглаж байгаа программаас хамааран автоматаар өөрчлөгдөх боломжтой аж. Тухайлбал, Adobe Premiere дээр ажиллах үед видео засварын үндсэн хэрэгслүүд болон тоглуулах удирдлагуудыг шууд хулганын дэлгэцээс ашиглаж болно.
Ямар команд, товчлуур харагдахыг Arctic Fox Technologies-ийн тусгай программаар тохируулах боломжтой байна.
Дэлгэцийг зөвхөн програмын удирдлагад ашиглахгүй. Таймер, сануулга болон хэрэглэгчийн өөр өөр профайлыг харуулах боломжтой бөгөөд ажлын урсгалыг илүү хурдан удирдахад чиглэжээ.
Дуу хоолойг текст болгоно
Super Mouse-д хэд хэдэн нэмэлт функц багтаасан байна. Тухайлбал, төхөөрөмж дуу хоолойг локал байдлаар текст болгон хөрвүүлэх чадвартай.
Мөн гироскоп мэдрэгчтэй бөгөөд 3.1 инчийн мэдрэгчтэй хэсгийг виртуал гар болгон ашиглаж болох аж.
Ингэснээр зарим команд, богино текст эсвэл товчлол оруулахын тулд компьютерын үндсэн гарт байнга хүрэх шаардлага багасч болох юм.
Гэхдээ Super Mouse утасгүй холболт дэмждэггүй. Төхөөрөмж зөвхөн USB-C кабелиар компьютерт холбогдож ажиллана.
Энэ шийдэл нь зөөврийн байдлыг тодорхой хэмжээгээр хязгаарлах боловч дэлгэц болон нэмэлт функцүүдийг тусдаа аккумуляторгүйгээр тасралтгүй тэжээлээр хангах давуу талтай.
Kickstarter дээр 199 ам.доллароос эхэлжээ
Super Mouse төслийг Kickstarter-ээр дэмжиж, төхөөрөмжийг урьдчилан авах үнэ 199 ам.доллароос эхэлж байна.
Харин бүтээгдэхүүн худалдаанд албан ёсоор гарах үед жижиглэнгийн үнэ нь 249 ам.доллар байхаар төлөвлөжээ.
Хөгжүүлэгчдийн мэдээлснээр эхний нийлүүлэлтийг 2027 оны хоёрдугаар сараас эхлүүлэхээр зорьж байна.
Ингэснээр Super Mouse нь ердийн компьютерын хулгана, мэдрэгчтэй удирдлага болон макропадын боломжийг нэг төхөөрөмжид нэгтгэсэн өвөрмөц шийдэл болж байна.
