Apple компани шинэ үеийн дээд зэрэглэлийн чихэвч болох AirPods Max 2-ийг албан ёсоор танилцууллаа. Гадаад төрхийг бараг өөрчлөлгүй хадгалсан ч дотоод үзүүлэлт, боломжуудыг мэдэгдэхүйц сайжруулсан байна.
Шинэ загвар 2026 оны гуравдугаар сарын сүүл, дөрөвдүгээр сарын эхээр худалдаанд гарах бөгөөд урьдчилсан захиалга гуравдугаар сарын 25-наас эхэлнэ. Үйлдвэрлэгчийн санал болгож буй үнэ 549 ам.доллар бөгөөд энэ нь Apple-ийн чихэвчүүд дундаа хамгийн өндөр үнэтэйд тооцогдож байна.
AirPods Max 2-ийн гол шинэчлэл нь Apple-ийн H2 чип юм. Энэхүү чипийн ачаар төхөөрөмжийн гүйцэтгэл сайжирч, идэвхтэй дуу чимээ дарах технологи өмнөх загвараас 1.5 дахин үр дүнтэй болсон байна.
Мөн Adaptive Audio горим нь орчны нөхцөлд тохируулан дуу чимээг автоматаар зохицуулдаг бол Conversation Awareness функц нь хэрэглэгчтэй хэн нэгэн ярьж эхлэх үед дууг автоматаар багасгадаг онцлогтой.
Шинээр нэмэгдсэн Live Translation функц нь iPhone болон Apple Intelligence системтэй холбогдсон тохиолдолд хэлний орчуулгыг бодит цагт хийх боломжийг бүрдүүлжээ. Үүнээс гадна USB-C холболтоор утсаар холбогдон 24-бит өндөр нягтаршилтай аудио тоглуулах боломжтой болсон байна.
Гэсэн хэдий ч AirPods Max 2-ийн дизайн 2020 онд танилцуулагдсан эхний загвартай бараг ижил хэвээр үлдсэн нь анхаарал татаж байна.
