Meta компани хиймэл оюун ухааны дэмжлэгтэй ухаалаг нүдний шилний цувралаа өргөжүүлж, Ray-Ban Meta Optics Styles нэртэй шинэ загваруудаа танилцууллаа. Эдгээр нь тус компанийн жортой линз ашигладаг хэрэглэгчдэд зориулсан анхны оптик ухаалаг шил болж байна.
Шинэ цувралыг EssilorLuxottica компанитай хамтран бүтээсэн бөгөөд өмнө нь гарсан Ray-Ban Meta, Oakley Meta Glasses болон Meta Ray-Ban Display загваруудын дараагийн үргэлжлэл болжээ.
Жортой линзтэй хэрэглэгчдэд зориулсан анхны загварууд
Шинэ цувралд Ray-Ban Meta Blayzer Optics Gen 2 болон Ray-Ban Meta Scriber Optics Gen 2 загварууд багтсан байна. Эдгээрийн үнэ 499 ам.доллар байх бөгөөд АНУ-д гуравдугаар сарын 31-нээс захиалга авч, дөрөвдүгээр сарын 14-нөөс худалдаанд гаргах төлөвтэй байна.
Окулярыг Ray-Ban-ийн дэлгүүрүүд, Ray-Ban.com сайт болон EssilorLuxottica-ийн сонгогдсон худалдааны цэгүүд болох LensCrafters, Sunglass Hut зэрэг газруудаар борлуулах аж.
Meta-ийн мэдээлснээр уг ухаалаг шил Их Британи, Канад, Австрали, Европ, АНЭУ зэрэг олон улсын зах зээлд мөн худалдаалагдана. Харин Бразил, Мексик, Энэтхэг зэрэг улсуудад энэ оны сүүлээр нэвтрүүлэхээр төлөвлөжээ.
Илүү нимгэн, тохируулгатай хүрээтэй
Meta шинэ Ray-Ban Meta Optics Styles загваруудаа тав тух, хувийн тохируулгыг голчлон анхаарч бүтээсэн гэж тайлбарлав.
Шинэ шилнүүд илүү нимгэн хүрээтэй, сольж болох хамрын тулгууртай, 10 градусаар нэмэлт эргэх нугас бүхий хийцтэй байна. Мөн хэрэглэгчийн нүүрний хэлбэрт илүү сайн тааруулахын тулд тохируулгатай чихний тулгууртай болжээ.
Blayzer Optics болон Scriber Optics загварууд нь нэг фокусын, прогрессив болон Transitions төрлийн линз зэрэг олон төрлийн линз дэмжинэ. Ингэснээр хэрэглэгч дотор болон гадаа орчинд шилээ солихгүйгээр ашиглах боломжтой болно.
12 мегапикселийн камер, 3K видео бичлэгтэй
Гүйцэтгэлийн хувьд Ray-Ban Meta Optics Styles нь өмнөх ухаалаг шилнүүдийн үндсэн боломжуудыг хадгалжээ.
Тэдгээрт 12 мегапикселийн камер суурилсан бөгөөд зураг авах, 3K нягтаршилтай видео бичих боломжтой. Мөн зургаан микрофонтой систем нь дуу бичлэгийн чанарыг сайжруулж, дуудлагыг илүү тод болгоход зориулагдсан байна.
Хэрэглэгчид Spotify, Amazon Music зэрэг платформоор хөгжим, подкаст сонсох, дуудлага авах, мессеж илгээх, мөн дуут командын тусламжтайгаар Meta AI-тай харилцах боломжтой.
Meta AI-д зориулсан тусгай товчлуур нэмэгдэв
Шинэ загваруудад тусгай Action Button нэмэгдсэн байна. Энэ товчлуур нь Meta AI руу хурдан нэвтрэх, контент шууд үүсгэх эсвэл богино команд ажиллуулахад зориулагджээ.
Meta AI туслах нь хэрэглэгчийн харж буй зүйл дээр үндэслэн нөхцөл байдлыг ойлгож, асуултад хариулах, тодорхой даалгаварт туслах боломжтой. Иймээс ухаалаг шил нь зөвхөн зураг, бичлэг хийх төхөөрөмж бус, бодит орчны мэдээлэлтэй ажилладаг AI туслах болж өргөжиж байна.
Шинэ өнгө, линзний сонголтууд гарна
Ray-Ban Meta Optics Styles-ээс гадна Meta улирлын шинэ өнгөний сонголтуудыг танилцуулжээ. Үүнд Ray-Ban Meta Gen 2 загварын Shiny Transparent Grey, Shiny Transparent Peach, Matte Transparent Peach зэрэг өнгө багтсан байна.
Мөн Oakley Meta загваруудад зориулсан шинэ өнгө, линзний хослолууд гарах бөгөөд гэрлийн нөхцөлд дасан зохицох Prizm Transitions линзний дэмжлэг нэмэгдэнэ.
Хоол бүртгэх, WhatsApp чат нэгтгэх функц нэмэгдэнэ
Meta ирээдүйн програм хангамжийн шинэчлэлтээр ухаалаг шилний AI боломжуудыг цаашид өргөжүүлэхээ мэдэгдсэн байна.
Шинээр нэмэгдэх функцүүдийн нэг нь хооллолт хянах боломж юм. Хэрэглэгч хоолныхоо зургийг авах эсвэл дуут команд ашиглан идсэн зүйлээ бүртгэж болно. Meta AI тухайн мэдээллээс гол үзүүлэлтүүдийг гаргаж, цаашид хувь хүнд тохирсон дүгнэлт санал болгох аж.
Мөн WhatsApp чатыг гар оролцуулахгүйгээр товчлон нэгтгэх функц нэвтрүүлэхээр ажиллаж байна. Энэ функцийн тусламжтайгаар хэрэглэгч Meta AI-аас ярианы товч агуулга эсвэл тодорхой мэдээллийг асууж авах боломжтой. Компанийн мэдэгдсэнээр өгөгдөл төхөөрөмж дээр боловсруулагдаж, төгсгөл хоорондын шифрлэлтийн хамгаалалттай байна.
Дохио зангаагаар бичих, дэлгэц бичих боломж хөгжүүлж байна
Meta-ийн ирээдүйн шинэчлэлтүүдэд Neural Handwriting нэртэй функц багтжээ. Энэ нь хэрэглэгч гадаргуу дээр хуруугаараа бичих хөдөлгөөн хийж, мессеж оруулах боломж олгох технологи юм.
Мөн display recording буюу харагдаж буй контентыг бичих функц нэмэгдэхээр байна. Энэ нь линзээр харагдаж буй визуал мэдээлэл, бодит орчны дүрс болон аудиог нэгтгэн хуваалцаж болох видео болгох боломжтой.
Үүнээс гадна Meta АНУ-ын хотуудад явган хүний навигацийг өргөжүүлж, хэрэглэгчийн харааны талбайд алхам алхмаар чиглэл заах боломжийг хөгжүүлж байна.
Эдгээр шинэ функцүүд ойрын саруудад Ray-Ban Meta-ийн төрөл бүрийн ухаалаг шилнүүдэд үе шаттайгаар нэвтрэх төлөвтэй байна.
