Apple 2026 онд бүрэн шинэчлэгдсэн MacBook Pro танилцуулж магадгүй талаар мэдээлэл цацагдлаа. Хэрэв энэ хэрэгжвэл загварын хувьд сүүлийн таван жилд тохиох хамгийн том шинэчлэлт болох төлөвтэй бөгөөд дизайн, дэлгэц, холболт, чипийн түвшинд зэрэг олон өөрчлөлт нэг дор хүлээгдэж байна.
OLED дэлгэц, нимгэрсэн их бие, холболтын шинэ хувилбарууд
Хамгийн том шинэчлэл нь OLED дэлгэцээр солигдох явдал гэж дурдсан байна. OLED нь тодрол, өнгөний баялаг байдал, хар өнгийн гүн, тодосгогчийн хувьд давуу талтай. Зарим эх сурвалжийн таамгаар Apple iPad Pro дээр ашигласан хоёр давхар Tandem OLED технологийг MacBook Pro-д нэвтрүүлэх хувилбар ярвигдаж байгаа аж. Мөн дэлгэцийн “ховил”-оос татгалзаж, камерт зориулсан жижиг нүхтэй шийдэлд шилжих магадлал яригдаж байна.
Шинэ загвар илүү нимгэн болох ёстой ч ерөнхий дүр төрхийг огцом өөрчлөхгүй гэх хүлээлт байна. Шинэчлэлт удааширсан шалтгааныг OLED зэрэг шинэ дэлгэцийн технологийг үйлдвэрлэлд бүрэн нэвтрүүлэхтэй холбоотой гэж тайлбарлажээ.
Шинжээчдийн дунд мэдрэгчтэй дэлгэцийн дэмжлэг нэмэгдэх боломжийг мөн дурддаг. Түүнчлэн Apple-ийн өөрийн модем ашигласнаар үүрэн холбооны холболттой MacBook Pro хувилбар гарч магадгүй гэсэн таамаг байна.
M6 руу шилжилт, 2nm процесс, танилцуулгын хугацааны таамаг
Техникийн гол шилжилт нь 2nm процессын технологиор үйлдвэрлэгдэх Apple M6 цуврал процессор руу орох магадлалтай гэж мэдээлэлд дурджээ. Эхний ээлжинд шинэ чипүүд MacBook Pro-ийн илүү өндөр үзүүлэлттэй хувилбаруудад түрүүлж орж ирэх боломжтой гэж үзэж байна.
Урьдчилсан мэдээллээр шинэ MacBook Pro-г 2026 оны намар танилцуулж, 2027 онд нийлүүлэлтийг илүү өргөн хэмжээнд нэмэгдүүлэх хувилбар яригдаж байна.
