OpenAI компани шинэ үеийн “Astra” хиймэл оюуны загвараа танилцуулж, энэ үйл явдлыг салбарын хөгжлийн том эргэлтийн нэг гэж тодорхойлжээ. Тус компанийн ерөнхийлөгч Greg Brockman танилцуулгын үеэр өнөөдрийн хиймэл оюуны чадвар AGI-ийн эрин эхэлж байгааг илтгэнэ гэж мэдэгдсэн байна.
AGI буюу Artificial General Intelligence нь олон төрлийн даалгаврыг хүний түвшинд эсвэл түүнээс давсан түвшинд гүйцэтгэх, суралцах, сэтгэх, хуримтлуулсан мэдлэгээ шинэ нөхцөлд ашиглах чадвартай хиймэл оюуны системийг хэлдэг.
OpenAI өмнө нь AGI-г “эдийн засгийн хувьд хамгийн үнэ цэнтэй ажлыг хүнээс илүү гүйцэтгэдэг бие даасан систем” хэмээн тодорхойлж байсан юм.
Brockman “энэ үеийг хүмүүс AGI эхэлсэн мөч гэж дурсана” гэж үзжээ
Greg Brockman шинэ загварын ач холбогдлыг тайлбарлахдаа хиймэл оюун зөвхөн асуултад хариулах түвшнээс гарч, шинжлэх ухаан, эдийн засаг, өдөр тутмын амьдралд бодит нөлөө үзүүлэх чадвартай болсон гэж онцолсон байна.
Тэрээр:
“Хэрвээ бид цаг хугацааг хэдэн жилээр урагшлуулаад хүмүүсээс AGI хэзээ бүтээгдсэнийг асуувал энэ цаг үеийг, энэ загварыг хэлнэ гэж би бодож байна. Эдгээр загварууд 100 жилийн настай математикийн бодлогуудын хариуг олох, эдийн засгийн өсөлтийг хурдасгах, хүмүүсийн өдөр тутмын амьдралд туслах зэрэг өргөн хүрээний үүрэгтэй болсон цаг үед бид ирээд байна. Тиймээс бид одоо AGI эринд шилжсэн гэж бодох нь үндэслэлтэй юм” гэж Брокман мэдэгджээ.
“Astra” хэдэн цаг шаарддаг ажлыг минутын дотор хийх чадвартай
OpenAI шинэ “Astra” загвараа шинжлэх ухааны нээлт, математик болон анагаах ухааны салбар дахь томоохон дэвшил гэж тодорхойлсон байна.
Компанийн тайлбарласнаар уг загвар зөвхөн судалгааны нарийн бодлого шийдэхээс гадна бодит амьдралын ажлуудыг ч маш богино хугацаанд гүйцэтгэх чадвартай аж.
Тухайлбал татварын тайлан бөглөх, компьютер тоглоомын дүрслэл бүтээх, архитектурын зураг боловсруулах, хоол захиалах зэрэг хүнд ойролцоогоор таван цаг шаардагдах ажлуудыг “Astra” ердөө хоёр минут 51 секундэд хийж чадна гэж мэдээлжээ.
Энэ нь хиймэл оюуныг өдөр тутмын ажил, мэргэжлийн даалгавар, бизнесийн үйл ажиллагаанд ашиглах боломж улам өргөжиж байгааг харуулж байна.
Sam Altman AGI гэх ойлголтыг эргэлзээтэй нэр томьёо гэж үзэж байв
OpenAI-ийн дотоодод AGI-ийн талаар ижил байр суурь байдаггүй нь мөн анхаарал татаж байна.
Тус компанийн гүйцэтгэх захирал Sam Altman-аас хэдхэн хоногийн өмнө AGI-ийн талаар асуухад тэр:
“Сайнаар хэлбэл энэ маш буруу тодорхойлсон нэр томьёо. Ямар нэг хамааралгүй маркетингийн нэр томьёо гэж хэлэхэд болно” гэж хариулж байв.
Ингэснээр Brockman өнөөгийн хөгжлийг AGI-ийн эрин эхэлсэн гэж үзэж байгаа бол Altman өөрөө уг ойлголтын тодорхойлолтод болгоомжтой хандаж байгаа нь харагдаж байна.
Аюулгүй байдлын асуудал ч давхар сөхөгдөж байна
“Astra”-гийн нээлт OpenAI хиймэл оюуны аюулгүй байдалтай холбоотой асуудалтай тулгарснаас хойш удаагүй байхад болж байгаа юм.
Өнгөрсөн сард компанийн хөгжүүлж байсан нэг загвар туршилтын үеэр хяналтаас гарч, системийг унтраах шаардлага үүссэн талаар мэдээлсэн.
Тухайн үед Sam Altman үүнийг:
“хиймэл оюуны аюулгүй байдлын хууль ёсны осол, тохируулгын алдаа, гарах ёсгүй байсан зүйл” гэж мэдэгдэж байжээ.
Ийм тохиолдол нь хиймэл оюуны загварууд илүү бие даасан, илүү өргөн боломжтой болохын хэрээр тэдгээрийг хянах, шаардлагатай үед хурдан зогсоох механизм зайлшгүй хэрэгтэйг дахин харуулж байна.
OpenAI болон Anthropic үнэлгээгээрээ ч өрсөлдөнө
Технологийн өрсөлдөөний хажуугаар хөрөнгө оруулалтын зах зээл дээрх өрсөлдөөн ч ширүүсэж байна.
OpenAI удахгүй хувьцаагаа анхдагч зах зээлд гаргаж, компанийн үнэлгээг хамгийн багадаа 850 тэрбум ам.долларт хүргэх зорилготой байгаа аж.
Харин гол өрсөлдөгчдийн нэг Anthropic мөн хувьцаагаа олон нийтэд санал болгохоор бэлтгэж, хоёр их наяд ам.долларын үнэлгээнд хүрэхээр зорьж байна.
Ингэснээр “Astra”-гийн танилцуулга нь зөвхөн шинэ загварын нээлт бус, хиймэл оюуны технологи, аюулгүй байдал болон хөрөнгө оруулалтын шинэ шат эхэлж байгааг харуулсан үйл явдал болж байна.
