Xiaomi Хятадын зах зээлд Mijia брэндийн шинэ, төсөвт ангиллын босоо ачаалалттай угаалгын машин танилцуулжээ. XQB60MJ101 загвар нь 6 кг хүртэл хувцас багтаах хүчин чадалтай бөгөөд нэг удаагийн угаалтаар 26 орчим футболк угаах боломжтой аж.
Шинэ загварын үнэ 587 юань буюу 100 ам.доллараас бага байгаа нь хамгийн их анхаарал татаж байна. Xiaomi энэ удаа ухаалаг функц олноор нэмэхийн оронд үндсэн хэрэглээ, жижиг хэмжээ, боломжийн үнэд төвлөрчээ.
Угаалгын машин нийт 10 төрлийн угаах горим болон усны түвшний 10 өөр тохиргоотой. Түргэн угаах шаардлагатай үед ашиглах 19 минутын богино хөтөлбөр ч багтсан байна.
Мөн угаалгыг 2-24 цагийн дараа автоматаар эхлүүлэх боломжтой хойшлуулсан асаалтын функцтэй. Ингэснээр хэрэглэгч угаалгын цагийг өдөр тутмын хуваарьтайгаа тохируулах боломжтой юм.
Өөрийгөө цэвэрлэх горим, хөвөн баригч шүүлтүүртэй
Хувцаснаас гарсан хөвөн, жижиг хогийг цуглуулах зориулалттай хоёр давхар торон шүүлтүүр суурилуулжээ.
Үүнээс гадна бөмбөрийг өөрөө цэвэрлэх горимтой бөгөөд хүчтэй усны урсгалаар дотор хэсэгт хуримтлагдсан бохирдлыг арилгадаг байна. Угаалга дууссаны дараа бөмбөрийн чийгийг багасгах агаарын хатаалт ч нэмэгдсэн бөгөөд энэ нь чийг удаан тогтох, эвгүй үнэр үүсэх эрсдэлийг бууруулах зорилготой.
6 кг-ын багтаамжтай хэдий ч машин ойролцоогоор 0.25 м² талбай эзэлнэ. Хэмжээ нь 496 × 507 × 814 мм тул жижиг орон сууц, угаалгын өрөөний зай хязгаарлагдмал айлуудад тохиромжтой байхаар хийгджээ.
Гадна хийц нь цагаан өнгийн энгийн загвартай бөгөөд удирдлагын хэсэгт хүүхдийн хамгаалалтын түгжээ суурилуулсан байна.
Хятадын эрчим хүчний үр ашгийн ангиллаар уг загвар нэгдүгээр түвшинд багтаж байгаа аж. Стандарт нэг удаагийн угаалтад 0.065 кВт·ц цахилгаан болон 78 литр ус зарцуулдаг гэж үйлдвэрлэгч мэдээлжээ.
Машин нь 220 В, 50 Гц цахилгаан сүлжээнд ажиллах бөгөөд IPX4 түвшний ус цацрахаас хамгаалалттай. Ажиллахад шаардагдах усны даралт 0.05-0.8 МПа байна.
Харин Mijia-ийн илүү үнэтэй зарим төхөөрөмжөөс ялгаатай нь энэхүү загварыг гар утасны апп-аар удирдах боломжгүй. Xiaomi холболтын нэмэлт боломжуудаас татгалзаж, өдөр тутмын угаалгад шаардлагатай үндсэн функц, бага зай эзлэх хийц болон хямд үнэд гол анхаарлаа хандуулжээ.
Ингэснээр шинэ Mijia XQB60MJ101 нь олон ухаалаг функц шаарддаггүй, харин жижиг хэмжээтэй, өдөр тутмын хэрэглээнд хангалттай багтаамжтай угаалгын машин хайж буй хэрэглэгчдэд чиглэсэн бүтээгдэхүүн болж байна.
