АНУ-ын Техасын их сургуулийн Остин дахь инженерүүд мэдээллийг синтетик хуванцрын молекулд хадгалах шинэ арга замыг амжилттай туршжээ. Энэ нь ирээдүйд хатуу диск (HDD) болон SSD зэргийг орлох боломжтой шинэ төрлийн мэдээллийн хадгалалт болох хандлагатай байна.
ДНХ-гийн зарчмыг дуурайсан шинэ технологи
Энэхүү технологи нь мэдээллийг ДНХ-д хадгалах зарчмыг дуурайсан бөгөөд ДНХ-ийн нэг давуу тал нь маш бага эзлэхүүнд асар их мэдээллийг хадгалах боломжтой байдал юм. Гэсэн хэдий ч ДНХ дээр суурилсан технологи нь өртөг өндөр, нарийн төхөөрөмж шаардагддаг.
Үүнийг шийдэх зорилгоор судлаачид хуванцар үндэстэй дөрвөн төрлийн мономер бүтээжээ. Эдгээр нь ДНХ-ийн нуклеотидүүдтэй төстэй бөгөөд тодорхой дараалалд холбогдох боломжтой.
Хэрхэн ажилладаг вэ?
- Судлаачид цахилгаан-химийн шинж чанар нь ялгаатай дөрвөн төрлийн хуванцар молекул бүтээсэн.
- Эдгээр мономерийг ашиглан 256 тэмдэгтээс бүрдэх цагаан толгой гаргаж авсан.
- Энэ цагаан толгойгоор «Dh&@dR%P0W¢» гэсэн нууц үгийг кодлон хуванцар гинжин хэлхээнд шингээжээ.
- Кодыг тайлахдаа цахилгаан дохио ашиглан мономерүүдийн задралын онцлогоор тухайн тэмдэгтийг тодорхойлдог. Энэ нь үнэтэй, том төхөөрөмж ашиглахгүйгээр мэдээллийг унших боломж олгож байна.
Судлаачдын тайлбар
Судалгааны багийн гишүүн, инженер Правин Пасупатигийн хэлснээр:
“Энэ бол хуванцрын бүтэц дотор мэдээлэл бичих анхны оролдлого бөгөөд үүнийг цахилгаан дохиогоор унших боломжтой. Бид янз бүрийн хүчдэлийн үед молекул хэрхэн задарч байгааг ажигласнаар ямар мономер задралд орж буйг тогтоож, улмаар кодыг тайлж чадна.”
Одоогийн сул талууд
- Одоогоор уг систем нэг удаа л уншигдах боломжтой, учир нь мономер тайлалтын явцад задардаг.
- 11 тэмдэгт бүхий нууц үгийг уншихад 2.5 цаг зарцуулсан.
- Гэсэн ч дараагийн шатанд хуванцар молекулыг микросхемтэй холбож, компьютертэй шууд холбогдох чадварыг хөгжүүлэхээр зорьж байна.
Хуванцрын давуу тал
ДНХ-тэй адил энэ төрлийн молекул мэдээллийг маш удаан хугацаанд, бага эзлэхүүнд хадгалах боломжтой. Харин уламжлалт хатуу диск болон флаш төхөөрөмжүүд цахилгаан хангамж шаардаж, хугацааны хувьд тэсвэр муутай байдаг.
