Майкрософт компанид сүүлийн саруудад тархаад байсан ажилчдын цомхотголтой холбоотой цуурхал баталгаажиж эхэллээ. Тус технологийн аварга компани нийт ажиллах хүчнийхээ 4 орчим хувийг цомхотгохоор төлөвлөж байгаа нь ойролцоогоор 9000 ажилтанд шууд нөлөөлөхөөр байна. Энэхүү цомхотголын давлагаа тоглоомын салбарыг, тэр дундаа Xbox-ийн багийг онцгой хүчтэй хамарч байгаа нь салбарынхны анхаарлыг татаж байна.
Хэдийгээр Microsoft-ийн тоглоомын салбар нь хэрэглэгчийн тоо болон контент үйлдвэрлэлийн хувьд рекорд амжилт үзүүлж байгаа ч удирдлагууд илүү төвлөрсөн, стратегийн шинэ бодлогыг хэрэгжүүлэх шаардлагатай хэмээн мэдэгдэв.
Xbox-ийн гүйцэтгэх захирал Фил Спенсер ажилчдад илгээсэн санамж бичигтээ:
“Өнгөрсөн хугацаанд гаргасан хүнд хэцүү шийдвэрүүдийн улмаас бид өнөөдөр хүчтэй байр суурьтай байна. Гэсэн хэдий ч урт хугацааны амжилтад хүрэхийн тулд одоо шинэ сонголт хийх шаардлагатай байна. Бид хамгийн их боломжит салбаруудад анхаарлаа хандуулж, давуу талаа хадгалах болно” хэмээн онцолсон байна.
Энэхүү шийдвэр нь Microsoft болон Xbox-ийн зүгээс сүүлийн хоёр жилийн хугацаанд хийж буй дөрөв дэх томоохон хэмжээний цомхотгол болж байна. 2023 оны эцсээр Microsoft тоглоомын салбарт түүхэн дэх хамгийн том худалдан авалтыг хийж, Activision Blizzard-ийг 68.7 тэрбум ам.доллараар худалдан авсан нь салбарын хүрээнд маш том шуугиан тарьсан. Гэсэн ч энэхүү томоохон худалдан авалт нь хүний нөөцийн хувьд шинэ зохицуулалт хийх шаардлагыг дагуулсан бололтой.
Тус цомхотголын хүрээнд ямар алба нэгж, ямар үүрэгтэй ажилчид илүүтэйгээр өртөж буй талаар дэлгэрэнгүй мэдээлэл хараахан гараагүй байгаа ч Xbox-ийн дотоод эх сурвалжуудын хэлж буйгаар бүтэц, бүтээмж, стратеги дахин тодорхойлох явцад энэ шийдвэр гарсан гэдгийг илтгэж байна.
1 сэтгэгдэл
Тэд Activision-ийг бараг 70 тэрбумаар худалдаж авсан – одоо тэд хүмүүсийг цомхотгож байна уу? Энэ нь рекорд орлоготой ч аварга том компанийг удирдах ямар хэцүү болохыг харуулж байна