6G хөгжүүлэлт хэт өндөр үзүүлэлт хөөхөөс татгалзаж байна
Зургаа дахь үеийн үүрэн холбооны стандарт болох 6G нь өмнөх үеийн технологиуд шиг бодит бус, хэт өндөр үзүүлэлт хөөх чиглэлээс аажмаар татгалзаж байгааг Хятадын Инженерийн академийн академич У Хэцюань мэдэгджээ.
Хятадын нэр хүндтэй эрдэмтэн 6G-ийн шинэ чиг хандлагыг тайлбарлав
MyDrivers хэвлэл онцолсноор, У Хэцюань нь Хятадын Инженерийн академийн нэр хүндтэй эрдэмтэн, инженер, академич бөгөөд тус улсад дижитал холбооны технологийн судалгаа, үнэлгээ, шинжилгээний салбарт чухал байр суурь эзэлдэг нэгэн юм. Тэрбээр энэ байр сууриа 2025 оны арваннэгдүгээр сарын 13-14-нд Бээжин хотод болсон Global 6G Conference буюу 6G технологи, үйлдвэрлэлийн экосистемийн дэлхийн хурлын үеэр илэрхийлсэн байна.
Анхны хүлээлттэй харьцуулахад 6G-ийн хурд илүү даруухан түвшинд буужээ
Түүний хэлснээр, эхний шатанд 6G сүлжээний оргил хурд 5G-ээс 100 дахин өндөр байна гэж төсөөлж байсан аж. Гэвч дараа нь Олон улсын цахилгаан холбооны холбоо буюу ITU энэ тооцооллыг тодруулж, 6G нь 5G-ээс ойролцоогоор 5-20 дахин хурдан өгөгдөл дамжуулах чадвартай байна гэж үзжээ. Харин 5G-A-тай харьцуулахад өсөлт нь ердөө 0.5-2 дахин байх төлөвтэй байгаа аж.
ITU-гийн мэдээллээр, 6G сүлжээний өгөгдөл дамжуулах хурд 300-500 Мбит/с болон түүнээс дээш түвшинд хүрэх боломжтой бөгөөд энэ нь 5G-ээс ойролцоогоор 3-5 дахин их, харин 5G-A-аас ердөө 0.3-0.5 дахин өндөр үзүүлэлт юм. Үүний зэрэгцээ өнөөгийн бодит хэрэглээнд 5G сүлжээний хурд 0.1-1 Гбит/с, харин 5G-A-ийн хурд 1-10 Гбит/с хүрч байгааг мөн дурдсан байна.
6G-ийн жинхэнэ давуу тал нь хурднаас илүү үр ашигт оршино
Академич У Хэцюань 6G-ийн үнэ цэнэ нь зөвхөн хурд дээр төвлөрөхгүй гэж онцолсон байна. Түүний үзэж байгаагаар, шинэ үеийн сүлжээний хамгийн том ахиц нь эрчим хүчний үр ашиг, саатал, найдвартай байдал зэрэгт илүү тод харагдах юм.
Тодруулбал, 6G сүлжээний эрчим хүчний үр ашиг 5G-ээс 90 хувиас илүү, харин 5G-A-аас долоо дахин илүү байх боломжтой аж. Мөн шинэ стандарт нь холбооны саатлыг мэдэгдэхүйц бууруулах бөгөөд 6G дээр энэ үзүүлэлт 0.1-1 мс байх төлөвтэй байна. Харьцуулбал, 5G дээр саатал 1-10 мс, харин 5G-A дээр 0.5-1 мс байдаг.
Үүнээс гадна холбооны найдвартай байдал ч өсөх бөгөөд 5G, 5G-A дээрх 99.999%, 99.9999% түвшнээс 6G дээр 99.99999% хүрэхээр байна.
Ирээдүйн 6G сүлжээ экстремал хурдны төлөө бус, бодит хэрэглээний төлөө ажиллана
MyDrivers хэвлэл У Хэцюанийн байр сууринаас иш татан мэдээлэхдээ, ирээдүйн 6G сүлжээ нь урьдын адил туйлын өндөр хурдны үзүүлэлтээр өрсөлдөхгүй бөгөөд 1000 Гбит/с түвшний зорилт тавих нь утгагүй гэж үзэж байгааг онцолжээ. Тэр ч бүү хэл, бодит хэрэглээний нөхцөлд ирээдүйн сүлжээний хурд нь зарим тохиолдолд 5G-A-аас ч бага байж болохыг дурдсан байна.
Ингэснээр 6G нь өмнөх үеийн холбооны стандартуудын адил зөвхөн тоон дээд үзүүлэлтээр өрсөлдөх биш, харин илүү ухаалаг, тогтвортой, хэмнэлттэй, найдвартай сүлжээ бий болгох чиглэлд хөгжиж буй нь тодорхой болж байна.
