Хятадын дэлгэц үйлдвэрлэлийн томоохон төлөөлөгч BOE нь 2025 онд Apple компанийн MacBook цувралын хамгийн том дэлгэц нийлүүлэгчээр тодорч, өрсөлдөгчдөө ардаа орхих төлөвтэй байна. Гэсэн ч энэ тэргүүлэх байр суурь урт хугацаанд үргэлжлэхгүй байх магадлалтай бөгөөд ирэх жил MacBook Pro загваруудад OLED дэлгэц нэвтрэх хүлээлттэй байна.
Omdia судалгааны байгууллагын мэдээлснээр, BOE-ийн MacBook дэлгэцийн захиалгад эзлэх хувь 2024 онд 39% байсан бол энэ онд 51% хүрч өсөх төлөвтэй байна. Энэ нь 13.6 ба 15.3 инчийн MacBook Air загваруудын LCD хавтангийн захиалга нэмэгдсэнтэй холбоотой. 2025 онд BOE нийт 11.5 сая ширхэг дэлгэц нийлүүлэхээр тооцоолж байгаа нь тус компанийн хувьд Apple-д анх удаа MacBook дэлгэцийн талаас илүү хувийг хангаж буй тохиолдол юм.
Apple энэ онд нийт 22.5 сая MacBook дэлгэц худалдан авахаар төлөвлөсөн. Энэ нь 2024 оны үзүүлэлттэй харьцуулахад ердөө 1%-ийн өсөлт боловч нийлүүлэгчдийн дунд захиалгын эрс хуваарилалт үүсч байна.
LG Display уламжлалт гол нийлүүлэгчийн байр сууриа алдсаар байгаа бөгөөд 2025 онд 8.48 сая ширхэг дэлгэц нийлүүлж, 35%-ийн зах зээлтэй үлдэх төлөвтэй байна. Энэ нь өмнөх оноос 12.2%-иар буурсан үзүүлэлт юм. Харин Sharp компани MacBook Pro загварт зориулсан мини-LED хавтан нийлүүлсээр байгаа ч 2025 онд тээвэрлэлт 3.1 саяд хүрч, зах зээлийн 14%-д буурна гэж таамаглаж байна.
Omdia-ийн дүгнэлтээр, Apple MacBook Air-ийн үйлдвэрлэлээ тэлсэн нь BOE-ийн амжилтад гол нөлөө үзүүлсэн. Гэхдээ тэд мөн BOE-ийн давамгайлал түр зуурынх байж болзошгүйг анхааруулж байгаа. Учир нь Apple 2026 оноос MacBook цувралд OLED технологи нэвтрүүлэхээр төлөвлөж байгаа бөгөөд OLED-ийн хувьд Samsung Display нийлүүлэгчээр нэгдэх хандлагатай байна.
OLED нь нимгэн, хөнгөн, өндөр контраст бүхий дэлгэцээрээ онцлог бөгөөд LCD-г орлох технологи болоход ойрхон байна. BOE-ийн жилийн 12%-ийн тогтмол өсөлт одоогоор тэднийг Солонгос, Японы өрсөлдөгчдөөс давуу байдалд хүргэж байгаа ч OLED руу шилжилтийн үеэр өрсөлдөөн эрс нэмэгдэх төлөвтэй байна.
