Ухаалаг гар утас үйлдвэрлэгчид хэрэглэгчдэд шинэ “сюрприз” барьж байна — удахгүй төхөөрөмжийн хайрцагнаас USB кабель хүртэл хасагдаж магадгүй болжээ.
Sony эхлэл тавьж байна
Reddit хэрэглэгчдийн мэдээлснээр, шинэ Sony Xperia 10 VII загвар ямар нэгэн цэнэглэгч, бүр кабельгүйгээр, зөвхөн бичиг баримт бүхий хайрцагтайгаар зарагдаж байгаа аж. Энэ нь ухаалаг гар утасны зах зээлд шинэ чиг хандлагын эхлэл байж болзошгүй гэж шинжээчид үзэж байна.
Өмнө нь үйлдвэрлэгчид хайрцагнаас цахилгаан хувиргагч (adapter)-ийг хасах шийдвэрийг байгаль орчны асуудалтай холбон тайлбарлаж байв. Тэдний хэлснээр, ингэснээр электрон хог хаягдал багасна гэж байсан ч одоо “экологийн санаа зовнил” нэрийн дор USB кабелийг ч хасах магадлалтай боллоо.
Apple-ийн жишгийг дагах уу?
Брэндүүдийн энэ шийдвэрийн урьдчилсан жишээ нь Apple юм. Тус компани анх iPhone-ы хайрцагнаас цэнэглэгчийг хасаж, дараа нь AirPods 4 болон AirPods Pro 3 загваруудаас USB кабель хассан.
Тэд үүнийг байгаль хамгаалах зорилгоор хийсэн гэж тайлбарласан ч хэрэглэгчдийн дунд эсрэг байр суурь давамгайлж байна. Олон хүн чанар муутай, хямд кабель худалдаж авах шаардлагатай болж, цаг хугацааны явцад илүү их электрон хог хаягдал үүсгэж болзошгүй гэж үзэж байна.
“Экологийн” эсвэл “эдийн засгийн” шийдвэр үү?
Мэргэжилтнүүдийн үзэж буйгаар, энэхүү чиг хандлага нь зөвхөн байгаль орчны асуудлаас үүдэлтэй биш, харин зардал бууруулах стратеги байж магадгүй юм. Цэнэглэгч, кабелийн үйлдвэрлэл, ложистикийн зардлыг хасах замаар компаниуд бүтээгдэхүүний ашигт ажиллагааг нэмэгдүүлж чадна.
Одоогоор Sony-ийн тохиолдол ганц жишээ байж болох ч, хэрэв энэ туршилт зах зээлд амжилттай болвол Samsung, Xiaomi, Google зэрэг томоохон брэндүүд ч даган хэрэгжүүлэх магадлалтай байна.
