iPhone 18 Pro загварын онцгой шинэ өнгө нь Dark Cherry буюу бараан интоорын өнгө байж магадгүй гэсэн мэдээлэл дахин баталгаажлаа. Weibo дээр Instant Digital нэрээр танигдсан инсайдер энэ тухай дахин мэдээлсэн бөгөөд тэр өмнө нь iPhone 14, iPhone 14 Plus-ийн өнгөнүүдтэй холбоотой мэдээллийг зөв гаргаж байсан гэж үздэг.
Түүний тайлбарласнаар, шинэ өнгө нь бургунд улаан, кофены бор, гүн нил ягаан өнгөний нийлмэл өнгө аяс бүхий хувилбар байх аж. Өөрөөр хэлбэл, өмнөх алдагдсан мэдээллүүдэд тус тусдаа дурдагдаж байсан бургунд, кофены, бараан нил ягаан гэх өнгөнүүд нь үнэндээ өөр өөр сонголт биш, харин нэг л өнгөний өөр тайлбарууд байжээ.
Үүнээс өмнө Macworld хэвлэл Apple компани iPhone 18 Pro болон Pro Max загварт зориулан дөрвөн шинэ өнгийг туршиж байгаа талаар хамгийн түрүүнд мэдээлсэн. Эдгээр өнгө нь одоогийн iPhone 17 Pro цувралын өнгөнүүдээс нэлээд өөр байх аж. Dark Cherry-гээс гадна Light Blue, Dark Gray, мөн уламжлалт Silver өнгө туршигдаж байгаа талаар дурдсан байна. Light Blue нь iPhone 13 Pro цувралын Sierra Blue-г санагдуулах өнгө байх магадлалтай гэжээ.
Харин iPhone 17 Pro дээр гарсан Cosmic Orange болон Deep Blue өнгөнүүдийн хувьд цааш үргэлжлэхгүй байж болзошгүй байна. Dark Cherry нь Pro цувралын “онцгой өнгө” гэсэн уламжлалыг үргэлжлүүлэх хувилбар болж байгаа аж. Өнгөрсөн жил ийм үүргийг Cosmic Orange гүйцэтгэсэн бөгөөд тэр өнгө Хятадын зах зээлд санаанд оромгүй сайн хүлээлт авсан гэж мэдээлэгдэж байв.
Тэр амжилт Apple-ийг дахин илүү содон, энгийн бус өнгөнд бооцоо тавихад хүргэсэн байж магадгүй гэж ажиглагчид үзэж байна. Гэсэн ч өмнөх жилийн адил туршигдаж буй бүх дөрвөн өнгө эцсийн хувилбарт үлдэнэ гэсэн баталгаа байхгүй юм.
Эвхэгддэг хувилбараас бусад iPhone 18 цувралын албан ёсны танилцуулгыг ирэх есдүгээр сард хийнэ гэж хүлээж байна.
