Хэрэглэгчид одоо нэг товшилтоор зар сурталчилгааг далдлах боломжтой
Google хайлтын системийн интерфэйсийг шинэчилж, хэрэглэгчдэд ивээн тэтгэсэн (sponsored) хайлтын үр дүнг нэг товшилтоор нуух боломжийг олгохоор болжээ. Энэхүү шинэчлэл нь аль хэдийн вэб хувилбар болон гар утасны аппликейшн дээр хэрэгжиж эхэлсэн гэж Engadget мэдээлэв.
Шинэ загварын дагуу бүх зар сурталчилгааны үр дүнг “Ивээн тэтгэсэн үр дүн” гэсэн нэгэн шошгоны дор нэгтгэж, хайлтын хуудасны дээд хэсэгт байрлуулна. Хэрэглэгч доод талд байрлах товчийг дарахад энэхүү блок нурах бөгөөд үр дүнгийн хуудсанд зөвхөн органик (жирийн) хайлтын мэдээлэл үлдэх юм. Дахин дарснаар зар сурталчилгаа эргэн гарч ирнэ.
Хайлтын илэрц илүү цэвэр, ойлгомжтой болно
Өмнө нь Google зар бүрийг тусад нь “Ивээн тэтгэсэн” гэсэн шошготой харуулдаг байсан бөгөөд энэ нь дэлгэцийн зайг их эзэлдэг гэж хэрэглэгчид шүүмжилдэг байв. Харин шинэ загвар нь төлбөртэй болон ердийн контентын ялгааг тодруулж, хайлтын дээд хэсэгт илүү цэгцтэй, дарамт багатай бүтэцтэй болгожээ.
Google-ийн мэдээлснээр,
“Шинэ интерфэйс нь зар сурталчилгааны тоог нэмэхгүй. Хэрэглэгчид нэг бүлэгт дөрвөөс илүү текстэн зар харахгүй” гэж тайлбарласан байна.
Шинэчлэл бүх төрлийн сурталчилгаанд үйлчилнэ
Энэхүү шинэчлэлт нь зөвхөн текстэн зар сурталчилгаанд бус, мөн бүтээгдэхүүний карт хэлбэрийн сурталчилгаанд ч хамаарах юм. “Ивээн тэтгэсэн үр дүн” гэсэн шошго нь хэрэглэгч хуудсыг гүйлгэж байх явцад үргэлж харагдах тул төлбөртэй хэсэг хаана дуусаж байгааг тодорхой ойлгох боломжтой.
Гэхдээ Google-ийн тайлбарласнаар, хэрэглэгч зар сурталчилгааны хэсгийг бүрэн гүйлгэж дууссаны дараа л тухайн блокийг нуух боломжтой. Өөрөөр хэлбэл, шинэ интерфэйс илүү цэвэр харагдах боловч зар сурталчилгааг бүрмөсөн устгахгүй юм.
Шүүмжлэлд хариу болгосон алхам
Энэхүү өөрчлөлт нь Google-ийн зар сурталчилгаа ба органик хайлтын үр дүнгийн ялгааг бүдгэрүүлсэн гэх шүүмжлэлд хариу болсон гэж шинжээчид үзэж байна.
2020 онд компани “Ad” шошгыг илүү төвийг сахисан “Ивээн тэтгэсэн” гэсэн нэртэй болгосон нь зар сурталчилгааг контентын нэг хэсэг мэтээр ойлгуулах оролдлого гэж зарим судлаач дүгнэж байв.
Гэсэн хэдий ч Google-ийн хувьд хайлтын зар сурталчилгаа бол орлогын гол эх үүсвэр хэвээр тул тэдгээрийг бүрэн арилгах магадлал бага гэж мэргэжилтнүүд онцолж байна.
