Интернет дэх текст контентын талаас илүү буюу 52 хувь нь хиймэл оюун ухаанаар (AI) үүсгэгдэж байгаа талаар хайлтын системийн аналитик, оновчлолын чиглэлээр ажилладаг Graphite компанийн судалгаанд дурджээ.
Хиймэл оюун ухааны өсөлт
2020–2025 оны хооронд 65 мянга гаруй вэб хуудсыг хамарсан уг судалгаагаар, 2022 оны сүүлээр ChatGPT гарснаас хойш автоматжуулсан агуулгын эзлэх хувь эрс нэмэгдсэн байна. Үүсгэгч AI загварууд өргөн хэрэглээнд орсноор “машинд бүтсэн” текстийн хэмжээ огцом өсч, интернетийг дүүргэсэн гэж судлаачид дүгнэжээ.
Хайлтын системүүд хүний контентыг илүүд үздэг
Гэсэн хэдий ч судалгаанд дурдсанаар, AI контент интернетийн дийлэнхийг бүрдүүлж байгаа ч хайлтын системүүд хүний бичсэн материалыг илүү үнэлдэг хэвээр байна.
- Google-ийн хайлтын үр дүнд гарч буй контентын зөвхөн 14% нь AI-аар бичигдсэн,
- харин 86% нь хүний гараар бүтээгдсэн байдаг аж.
AI ч мөн хүний бүтээлийг илүүд үздэг
Сонирхолтой нь, AI өөрөө хариулт үүсгэхдээ 82% тохиолдолд хүний бичсэн эх сурвалжид тулгуурладаг гэж Graphite тэмдэглэжээ. Энэ нь хиймэл оюун ухаан ч хүний бүтээлч агуулгыг чанартай, итгэлтэй гэж “үздэг”-ийг харуулж байна.
Хүний бүтээлч байдал чухал хэвээр
Судалгааны багийн дүгнэлтээр, хэдийгээр AI агуулга тоо хэмжээний хувьд давамгайлж байгаа ч чанар, итгэлцлийн түвшинд хүний бүтээлч байдал шийдвэрлэх үүрэгтэй хэвээр байна. Хэрэглэгчдийн дийлэнх нь хүний бичсэн материалыг илүү найдвартай, үнэ цэнэтэй гэж үздэг гэнэ.
Graphite дүгнэхдээ:
“AI агуулга нэмэгдэж байгаа нь гарцаагүй ч хайлтын системүүдийн шүүлтүүр, хэрэглэгчдийн эрэлтээс шалтгаалан хүний бүтээлч байдал ба автоматжуулалтын хоорондын тэнцвэр хадгалагдсаар байна” хэмээн онцолжээ.
1 сэтгэгдэл
Ирээдүйд AI ба хүний бүтээл аль нь давамгайлах бол?