GTA 6 — 10 мянга гаруй хөгжүүлэгчийн хамтын бүтээл, гол бааз нь Энэтхэгт

30

Rockstar India — хөгжүүлэлтийн гол хүч

“Grand Theft Auto VI” төслийг 10,000 гаруй хөгжүүлэгч оролцсон Rockstar Games-ийн дэлхийн баг бүтээж байна. Энэхүү аварга хэмжээний төслийн гол хэсгийг Энэтхэг дэх Rockstar India хэлтэс хариуцаж байгаа бөгөөд тус төвд 1600 гаруй инженер, дизайнер, программист ажиллаж байгаа аж.

Rockstar-ын бусад салбарууд Нью-Йорк, Лондон, Эдинбург, Торонто зэрэг хотуудад байрладаг. Тухайлбал, Rockstar North-д 1285, Rockstar Lincoln-д 910 хөгжүүлэгч ажиллаж байгаа ч хамгийн том бүтэц бүхий нэгж нь Энэтхэгийн баг болж байна. Тэд GTA 6-ын техникийн нарийвчлал, графикийн гүйцэтгэл болон орчны дэлгэрэнгүй моделчлолд түлхүү оролцож буй гэж эх сурвалжууд онцолжээ.

Түүхэн дэх хамгийн том төсөвтэй тоглоом

GTA 6-г тоглоомын салбарын түүхэнд хамгийн өндөр өртөгтэй төсөл гэж үзэж байна. Түүний төсөв нэг тэрбум ам.доллараас давсан гэх яриа байгаа бөгөөд шинжээчид борлуулалтын амжилтаараа өмнөх бүх дээд амжилтыг эвдэх төлөвтэй гэж таамаглаж байна.

Rockstar-ийн зүгээс албан ёсны төсвийн тоо мэдээлээгүй байгаа ч төслийн цар хүрээ, орчин үеийн график хөдөлгүүр болон хиймэл оюун ухаанд суурилсан шинэ тоглоомын системүүд нь компанийн хамгийн том хөрөнгө оруулалт болжээ.

Нээлтийн тов ойртож байна

GTA 6-гийн нээлт 2026 оны тавдугаар сард болох төлөвтэй байгаа бөгөөд Digital Foundry-ийн шинжээчид саяхан 2025 оны тавдугаар сарын 7-нд гарсан хоёр дахь трейлерт дүн шинжилгээ хийж, графикийн бодит дүрслэл болон физикийн системийг онцлон үнэлсэн байна.

Шинжээчдийн хэлснээр GTA 6 нь зөвхөн тоглоомын технологийн шинэ түвшинг тодорхойлоод зогсохгүй, дэлхийн хамгийн олон хөгжүүлэгч оролцсон төслүүдийн нэг болж түүхэнд бичигдэхээр байна.