Chrome-д удаан хүлээсэн босоо табын дэмжлэг гарав
Edge, Firefox болон бусад орчин үеийн хөтөчүүдэд аль хэдийн нэвтэрсэн босоо табын шийдэл одоо Google Chrome-д туршилтын шатанд орж ирлээ. Chrome-ийн бета түвшний хувилбар дээр нэмэгдсэн энэхүү шинэ тохиргоо нь олон таб нээж ажилладаг хэрэглэгчдийн ажиллах орчинг илүү цэгцтэй, удирдахөд хялбар болгох зорилготой.
Одоогийн байдлаар энэ боломжийг Chrome-ийн туршилтын сувгийн хувилбар болох Chrome Canary дээр шалгаж байна. Шинэ функц нь уламжлалт дээд талын хэвтээ табыг хажуугийн босоо самбарт шилжүүлснээр нэгэн зэрэг олон цонхтой ажиллах үед илүү тухтай харагдах, илүү зохион байгуулалттай байлгах нөхцөлийг бүрдүүлдэг.
Босоо табыг хаанаас, хэрхэн идэвхжүүлэх вэ?
Туршилтын энэ функц одоогоор анхдагчаар идэвхжээгүй тул хэрэглэгч өөрөө тохиргооноос асаах шаардлагатай.
Chrome Canary-г нээгээд хөтөчийн дээр байрлах хэвтээ табын мөрөн дээр хулганы баруун товчийг дарахад жижиг цэс гарч ирнэ. Тэндээс “Хажуу талын табуудыг харуулах” гэсэн сонголтыг дармагц хөтөчийн харагдах байдал шууд өөрчлөгдөж, нээлттэй байсан бүх таб хажуугийн самбар руу шилждэг.
2-ын 1 гэж хэлж болох энэ өөрчлөлтийн үр дүнд дээд хэсэгт хайлтын болон хаягийн мөр үлдэж, харин бүх таб хажуу талын баганад дарааллан харагдах ба нэг дэлгэц дээр илүү олон сайтын цонх багтах боломжтой болж өгнө.
Босоо таб идэвхжсэн үед ямар байдлаар харагдах вэ?
Босоо табыг идэвхжүүлсний дараа Chrome-ийн интерфейс багагүй өөрчлөгдөнө. Хайлтын мөр, вэб хаяг оруулах талбар урьдын адил дээд хэсэгт байрлах боловч табууд бүхэлдээ хажуугийн самбар руу шилжиж, жагсаалтын хэлбэрээр харагддаг.
Хажуугийн самбарын доод хэсэгт табын бүлгүүдийг удирдах боломж, мөн шинэ таб нээх товч байрлана. Ингэснээр олон табыг бүлгээр нь ангилан харах, нэг дороос удирдах боломжтой болж, жижиг дэлгэцтэй төхөөрөмж дээр ч ажлыг илүү эмх цэгцтэй явуулах нөхцөл бүрдэнэ.
Хэрэв хэрэглэгч өмнөх байдалдаа буцаж, Chrome-оо уламжлалт хэвтээ табын зохион байгуулалтаар ашигламаар байвал энэ нь ч маш амархан. Хажуугийн самбар дээр дахин хулганы баруун товчийг дараад гарч ирэх цэснээс “Дээрээс нь табуудыг харуулах” гэдэг сонголтыг товшиход табууд дахин дээд хэсэгт очиж, хуучин танил харагдацдаа шилжинэ.
Тогтвортой Chrome дээр хэзээ албан ёсоор гарах вэ?
Шинэ босоо табын функц одоогоор зөвхөн Chrome Canary-д туршигдаж байгаа бөгөөд олон нийт өдөр тутам хэрэглэдэг Chrome-ийн тогтвортой хувилбарт нэмэгдэх тодорхой хугацааг Google хараахан зарлаагүй байна.
Компани шинэ боломжуудыг албан ёсоор нэвтрүүлэхээс өмнө гүйцэтгэл, тогтвортой ажиллагаа, хэрэглэгчдийн санал хүсэлтийг харгалзан үзэж, шаардлагатай тохиолдолд дизайны болон техникийн олон өөрчлөлт хийдэг практиктай. Тиймээс босоо табын шийдэл эцсийн байдлаар ямар хэлбэртэй болох, мөн бүх хэрэглэгчдэд хэзээ хүрэх нь одоогоор тодорхой бус хэвээр байна.
Гэсэн ч олон таб зэрэг нээж ажилладаг, дэлгэцийн өндрийг илүү үр дүнтэй ашиглах дуртай хүмүүсийн хувьд Chrome-д босоо табын дэмжлэг туршигдаж эхэлсэн нь өөрөө л анхаарал татсан, хүлээлт үүсгэсэн шинэ мэдээ болж байна.
