Сингапурын дунд сургуулиудад 2026 оны нэгдүгээр сараас эхлэн сурагчид сургууль дээрээ ухаалаг гар утас, ухаалаг цаг ашиглахыг бүр мөсөн хориглохоор болж байна. Өмнө нь зөвхөн хичээлийн үеэр хэрэглэхийг хориглодог байсан бол одоо энэ журам сургуульд өнгөрүүлэх бүх хугацаанд үйлчлэхээр өргөжиж байна.
Дэлгэцийн хэрэглээг хязгаарлах шинэ бодлого
Боловсролын яам ням гарагт гаргасан мэдэгдэлдээ энэхүү шийдвэр нь дунд сургуулийн сурагчдын дунд дэлгэцийн хэрэглээтэй холбоотой эрүүл дадлыг төлөвшүүлэх, сөрөг нөлөөг бууруулах цогц арга хэмжээний нэг хэсэг болохыг онцолжээ.
Шинэ журам хэрэгжсэнээр сурагчид сургууль дээр авчирсан ухаалаг гар утас, ухаалаг цаг зэрэг төхөөрөмжөө хичээлийн туршид зориулалтын хадгалах хэсэгт эсвэл өөрсдийн цүнхэнд хийж хадгалсан байх ёстой. Ийм байдлаар сурагчид анги дотор, хонгилд, завсарлагаар ч уг төхөөрөмжүүдийг ашиглах боломжгүй болж байна.
Гэсэн хэдий ч яамны тайлбарласнаар сургуулиуд эрүүл мэнд, онцгой шаардлага, гэр бүлийн яаралтай холбоо зэрэг зайлшгүй тохиолдолд дүрмийг уян хатан хэрэгжүүлэх боломжтой байхаар зохицуулалт хийжээ.
Ухаалаг төхөөрөмж, дэлгэцийн сөрөг нөлөө
Боловсролын яамны мэдэгдэлд:
“Сурагчдын хувьд дэлгэц ширтэх нь унтах, биеийн тамирын дасгал хөдөлгөөн хийх, найз нөхөд, гэр бүлийнхэнтэйгээ харилцах зэрэг чухал үйл ажиллагааг орлодог бөгөөд биеийн ерөнхий байдлыг муутгадаг болохыг баталсан”
хэмээн дурдсан байна.
Ингэснээр сургуулийн орчинд ухаалаг төхөөрөмжийн хэрэглээг багасгах нь хүүхдүүдийн нойр, хөдөлгөөний идэвх, нүүр тулсан харилцааг нэмэгдүүлэх замаар сэтгэл зүй, биеийн ерөнхий эрүүл мэндэд эерэг нөлөө үзүүлнэ гэж үзэж байна.
Сингапурын боловсролын салбарын энэхүү шинэ алхам нь дэлгэцийн донтолт, онлайн орчны хэт хэрэглээг хязгаарлах чиглэлд бодлогын түвшний тодорхой хариу арга хэмжээ болж, бусад оронд жишиг болох магадлалтай байна.
