Windows 11 2025 оны 11 дүгээр сарын томоохон шинэчлэлтийг хүлээн авснаар Start цэс үндсээрээ өөрчлөгдөв. Шинэ хувилбар нь үйлдлийн системийн түүхэнд байгаагүй хэмжээнд тохируулж өөрчлөх боломжтой болсон төдийгүй нээгдэх үедээ дэлгэцийн ихэнх хэсгийг эзэлдэг болжээ.
Windows Latest-ийн мэдээллээр KB5068861 (Build 26200.7171) шинэчлэлтийг суулгасны дараа Start цэс нь дэлгэцийн босоо зайны ойролцоогоор 90 хувийг эзэлдэг болсон байна. Өмнөх хувилбаруудад энэ үзүүлэлт ердөө 50–60 орчим хувь байв. Хэрэв Phone Link модуль идэвхтэй байвал Start цэс бүрэн дэлгэцийн горимд шилжинэ.
Microsoft шинэ загварыг бүх хэрэглэгчдэд нэг дор бус, аажмаар идэвхжүүлж байгаа тул зарим төхөөрөмж дээр хуучин загвар харагдсаар байх магадлалтай. Харин шинэчлэл суусны дараа эргээд өмнөх Start цэсэнд буцах боломж үлдээгүй байна.
Start цэс нэг цул орон зай болж өөрчлөгдлөө
Шинэчлэлийн хамгийн том өөрчлөлтийн нэг нь олон хэсэгт хуваагдсан бүтэцээс татгалзсан явдал юм. Одоо Start цэс нэг дор:
- зүүж бэхэлсэн програмууд,
- санал болгож буй агуулга,
- програмын бүрэн жагсаалтыг
нэгэн зэрэг харуулдаг болсон.
Анхдагч тохиргоогоор “Ангилал” гэсэн харагдац идэвхтэй байна. Энэ нь програмуудыг Бүтээмж, Үзвэр үйлчилгээ, Хэрэгслүүд гэх мэт хэсгүүдэд автоматаар ангилан бүлэглэдэг. Хэрэглэгч хүсвэл Android болон iOS-той төстэй Grid (Тор) хэлбэрийн харагдац руу эсвэл уламжлалт Жагсаалт хэлбэрийн горим руу шилжих боломжтой.
Мөн анх удаа өмнө нь заавал идэвхтэй байдаг “Санал болгож буй” хэсгийг бүрэн унтраах сонголт нэмэгдсэн нь олон хэрэглэгчийн хүсэж байсан өөрчлөлтийн нэг байлаа.
Яагаад Start цэс ийм том болсон бэ?
Хэрэглэгчдийг хамгийн их гайхшруулж буй зүйл нь зөвхөн интерфэйсийн харагдац биш, харин Start цэсийн өндөр огт багасахгүй байгаа явдал юм.
Зөвлөмж асаалттай эсэх, хэдэн мөр бэхэлсэн програмтой байх, мөн Ангилал, Тор эсвэл Жагсаалтын аль харагдацыг ашиглаж байгаагаас үл хамааран Start цэсийн эзлэх босоо хэмжээ бараг өөрчлөгдөхгүй.
- 1920×1080 нягтралтай 14 инчийн дэлгэц дээр Start цэс 16:9 харьцаатай дэлгэцийн бараг бүх өндрийг эзэлдэг.
- Интерфэйсийн масштабыг 125% болгож өсгөхөд цэс бүр ч их зай авна.
- 720p нягтралтай дэлгэц дээр Start цэс дээд талын ирмэг бараг хүрэх хэмжээнд сунадаг.
- Зөвхөн 4K нягтрал дээр 150–175%-ийн масштабтай хэрэглэж буй үед л дэлгэцийн зай арай бага алдагдсан мэт харагдана.
Энэ нь Start цэсэнд илүү их агуулга багтаахын зэрэгцээ Windows-ийн интерфэйсийг ирээдүйн босоо чиглэлтэй, Agent-тулгуурласан концепц руу аажмаар ойртуулж буй алхам гэж ажиглагчид үзэж байна.
Windows 10-той харьцуулбал: хэмжээг нь чирээд багасгах боломж үгүйлэгдэв
Windows 10-ийн Start цэсийн нэг том давуу тал нь хэрэглэгч хүрээг нь чирч, өөрийн хэрэгцээнд тохируулан хэмжээг нь багасгаж, томруулах боломжтой байсан явдал байлаа. Мөн taskbar-ийг дэлгэцийн аль ч тал руу (дээд, доод, зүүн, баруун) чөлөөтэй зөөж байрлуулж болохоороо онцлог байсан.
Windows 11 дээр хэрэглэгчид олон жилийн турш taskbar-ийг хажуу тийшээ байрлуулах, Start цэсний хэмжээг гараар тохируулах боломжийг буцааж өгөхийг байнга шаардаж байгаа ч Microsoft өөр чиглэлд анхаарлаа төвлөрүүлж байна.
Шинэ хувилбаруудад, ялангуяа Agent Mode-ын нэвтрэлтийн хамтаар taskbar-ийн үүрэг, интерактив боломжуудыг нэмэгдүүлэхэд илүү ач холбогдол өгч байгаа нь Start цэсний чөлөөт хэмжээ тохиргоо болон босоо taskbar-ийг буцаахад техникийн хувьд хүндрэл үүсгэж байж болзошгүй.
Юу хийх вэ: масштабаа зөв тааруулах л үлдэв
Microsoft-ийн албан ёсны зөвлөмжид Start цэсний хэмжээ шууд багасахгүй ч дэлгэцийн тохиргоо, масштаб-ыг зөв тохируулснаар хэрэглээний туршлагаа арай тав тухтай болгож болно гэж дурдсан байна. Үүнд:
- Тохиргоо → Дэлгэц → Масштаб хэсэгт орж, интерфэйсийн ерөнхий масштабыг өөрчлөх
- Тохиргоо → Хүртээмж → Текстийн хэмжээ хэсгээр дамжуулан зөвхөн бичгийн хэмжээ тохируулах
зэргийг санал болгожээ.
Эдгээр тохиргоо нь Start цэсийг өөрийг нь жижгэрүүлэхгүй ч дэлгэц дээрх элементүүдийн харьцааг өөрчилж, харагдацыг бага зэрэг “амьсгалтай” болгоход тусалж магадгүй.
Шинэчлэгдсэн Start цэсийг Microsoft аль хэдийн бүх Windows 11 хэрэглэгчдэд түгээж эхэлсэн ч шат дараатай нэвтрүүлж буй тул зарим хэрэглэгчид одоогоор хуучин Start загварыг харж байсаар байх боломжтой. Харин шинэ загвар идэвхжсэн л бол өмнөх хувилбар руу буцах сонголт байхгүй хэвээр байна.
