Шинэ технологи хотын үерийн эрсдэлийг урьдчилан тооцоолно
Google компани Groundsource нэртэй хиймэл оюун ухаанд суурилсан шинэ хэрэгслийг танилцуулж, өмнө нь урьдчилан таамаглахад хүндрэлтэй байсан гэнэтийн үерийг илүү нарийвчлалтай тооцоолох боломжийг бүрдүүллээ.
Энэхүү систем нь олон жилийн турш цуглуулсан нээлттэй мэдээлэлд тулгуурласан бөгөөд Gemini технологийн тусламжтайгаар 150 гаруй улсад бүртгэгдсэн 2.6 сая гаруй үерийн тохиолдлыг илрүүлжээ. Харин Google Maps ашиглан эдгээр үйл явдлын байршлыг тодорхойлж, хот суурин газрын үерийн тусгай өгөгдлийн сан бүрдүүлсэн байна.
Flood Hub-д нэвтэрч, 2 тэрбум хүнд хүрч байна
Энэхүү өгөгдөл дээр үндэслэн боловсруулсан загвар нь гэнэтийн үерийг 24 цагийн өмнө таамаглах чадвартай болсон. Уг таамаглалуудыг Flood Hub платформд нэгтгэснээр одоогийн гол мөрний үерийн мэдээлэлтэй хамт 150 гаруй улсад амьдарч буй ойролцоогоор 2 тэрбум хүнийг хамарч байна.
Google-ийн үзэж байгаагаар энэ нь орон нутгийн иргэд, байгууллагуудад байгалийн гамшигт урьдчилан бэлтгэх илүү их хугацаа олгоно. Мөн Groundsource нь судлаачид болон түнш байгууллагуудад нээлттэй өгөгдлийн сан болж, ялангуяа мэдээлэл хомс байсан хот суурин бүсүүдэд судалгаа хийхэд ашиглагдах боломжтой юм.
Цаашид энэ аргыг хөрсний гулсалт, халалтын давалгаа зэрэг бусад байгалийн аюулыг урьдчилан таамаглахад ашиглах боломжтой гэж компани мэдэгдсэн байна.
