Apple энэ намрын гол танилцуулгаа есдүгээр сарын 9-нд хийхээ албан ёсоор баталлаа. Тус компани Apple Park дахь Steve Jobs Theater-т болох арга хэмжээнийхээ богино teaser-ийг нийтэлсэн бөгөөд энэ удаагийн танилцуулга технологи сонирхогчдын дунд хэдийнэ өндөр хүлээлт үүсгээд байна.
Арга хэмжээ Номхон далайн цагаар 10:00 цагт эхэлнэ. Танилцуулгыг Apple-ийн албан ёсны цахим хуудас, YouTube болон Apple TV-ээр шууд дамжуулах юм.
Apple-ийн маркетингийн удирдах албан тушаалтан Greg Joswiak уг арга хэмжээний талаар:
“Surprise and shine! It’s almost time for the #AppleEvent, on Wednesday, September 9!” гэж нийтэлсэн байна.
Энэ удаа Apple iPhone 18 Pro, iPhone 18 Pro Max, Apple Watch Series 12 болон Apple Watch Ultra 4 зэрэг шинэ бүтээгдэхүүнээ танилцуулах төлөвтэй байгаа аж. Гэхдээ хэрэглэгчдийн гол сонирхол энгийн Pro загварын шинэчлэл дээр бус, компанийн анхны эвхэгддэг iPhone дээр төвлөрч байна.
Apple-ийн нийтэлсэн teaser-ийн дараа олон хэрэглэгч эвхэгддэг iPhone-ийн талаар асууж, зурагт ямар нэгэн далд дохио байгаа эсэхийг хайж эхэлжээ. Энэ нь Apple-ийн анхны foldable загвар зах зээлд гарах эсэх талаарх хүлээлт хэр өндөр байгааг харуулж байна.
Хэрэв Apple үнэхээр эвхэгддэг iPhone танилцуулбал энэ нь компанийн smartphone-ийн түүхэн дэх хамгийн том загварын өөрчлөлтүүдийн нэг болж магадгүй. Samsung болон бусад үйлдвэрлэгчид хэдийнэ эвхэгддэг төхөөрөмжийн ангилалд идэвхтэй өрсөлдөж байгаа ч Apple энэ зах зээлд хэзээ, ямар шийдлээр орох нь олон жилийн турш таамаг хэвээр байсан юм.
Энэ арга хэмжээ Apple-ийн удирдлагын өөрчлөлтийн дараах анхны том танилцуулга гэдгээрээ мөн онцлогтой. Есдүгээр сарын 1-нээс John Ternus гүйцэтгэх захирлын албыг хүлээн авч, Tim Cook гүйцэтгэх даргын байр сууринд шилжихээр болсон тул есдүгээр сарын 9-ний тайз шинэ удирдлагын анхны том сорилт болох юм.
Ийнхүү Apple-ийн энэ намрын танилцуулга iPhone 18 Pro болон шинэ Apple Watch загваруудаас гадна эвхэгддэг iPhone-ийн талаарх асар их хүлээлтээр онцгой анхаарал татаж байна. Танилцуулгын өдөр компани үнэхээр шинэ ангиллын iPhone-оо дэлгэх үү гэдэг нь хамгийн том асуулт хэвээр байна.
