Dyson амны хөндийн арчилгааны зах зээлд анх удаа хүч сорьж, CameraJet нэртэй ухаалаг цахилгаан шүдний сойзоо танилцуулжээ. Энэхүү төхөөрөмж нь камер, машин сургалтын систем болон шүдний завсар руу шингэн цацах төхөөрөмжийг нэг дор багтааснаараа онцлог байна.
CameraJet нь энгийн шүд угаах үйлдлээс гадна усан цэвэрлэгээ болон ам зайлах үүргийг давхар гүйцэтгэх боломжтой аж.
Шүдний завсрыг камерын тусламжтай автоматаар илрүүлнэ
Сойзны толгойн доод хэсэгт 100 мянган цэгийн нягтралтай ойрын зураг авах камер байрлуулжээ.
Dyson-ийн Gap Optical Targeting систем секундэд 28 дүрс боловсруулж, шүд хоорондын завсрыг автоматаар таних боломжтой байна.
Тус системийн алгоритмыг нийт 470 мянган шүдний зураг дээр сургажээ.
Камер шүдний завсрыг илрүүлсний дараа ойролцоогоор 100 миллисекундийн дотор тухайн хэсэг рүү конус хэлбэрийн шингэний урсгалыг автоматаар чиглүүлнэ. Ингэснээр хэрэглэгч тусдаа усан цэвэрлэгч ашиглах шаардлагагүй болох боломжтой.
12.5 мл-ийн шингэний савтай
CameraJet-ийн их биед 12.5 мл багтаамжтай шингэний сав болон тусгай шахуурга суурилуулжээ.
Энэ шийдлийн ачаар сойзыг ямар байрлалд барьж байгаагаас үл хамааран шингэнийг тогтвортой цацах боломжтой аж.
Хэрэглэгч шингэн цацах автомат болон гар ажиллагааны хоёр горимоос сонгох боломжтой.
Сойзны толгой секундэд бараг 1000 хөдөлгөөн хийдэг бөгөөд хоёр өөр төрлийн үс ашигладаг байна. Нэг нь шүдний гадаргууг цэвэрлэхэд, нөгөө нь буйлны дагуух хэсгийг илүү нарийн цэвэрлэх зориулалттай.
Гар утаснаасаа цэвэрлэгээгээ хянах боломжтой
CameraJet нь MyDyson хэрэглүүртэй утасгүй сүлжээ болон Bluetooth-оор холбогдоно.
Хэрэглэгч гар утсаараа камерын дүрсийг бодит хугацаанд харах боломжтой бөгөөд сойз аль хэсгийг сайн цэвэрлэсэн, аль хэсгийг алгассан талаар зураглал хүлээн авах юм.
Мөн систем цэвэрлээгүй хэсгийн талаар зөвлөмж өгч, сойзны ажиллагааны хүчийг тохируулах боломж олгоно.
Dyson-ийн мэдээлснээр камерын дүрс болон зураг ямар ч үед бичигдэхгүй, хадгалагдахгүй. Тэдгээрийг төхөөрөмж дээр ч, үүлэн хадгалалтад ч үлдээхгүй гэж компани онцолжээ.
Сойзны толгой өөрөө хэрэглээний тоог хянадаг
CameraJet-ийн сольж ашигладаг толгой бүр RFID тэмдэглэгээтэй байна.
Үүний тусламжтай төхөөрөмж тухайн толгойг хэдэн удаа ашигласныг тооцоолж, солих хугацаа болсон үед хэрэглэгчид сануулга өгөх боломжтой аж.
Мөн мэдрэмтгий шүд болон буйлтай хүмүүст зориулсан илүү зөөлөн тусгай толгойг тусад нь худалдаанд гаргахаар төлөвлөжээ.
Үндсэн багцад цэнэглэх суурь болон аяллын гэр мөн багтана.
CameraJet-ийн үнэ 499.99 ам.доллар
Dyson CameraJet нь Ceramic Ultra Blue болон Ceramic Pink гэсэн хоёр өнгөөр худалдаанд гарах юм.
Үнэ нь 499.99 ам.доллар бөгөөд АНУ-д урьдчилсан захиалга хэдийн эхэлжээ.
Dyson-ийн мэдээлснээр энэхүү төхөөрөмжийг боловсруулах ажил зургаан жил үргэлжилсэн бөгөөд төслийн хүрээнд нийт 661 инженер ажилласан байна.
Ийнхүү Dyson үс хатаагч, агаар цэвэршүүлэгч, тоос сорогчоороо танигдсан брэндийн хүрээнээс гарч, камер, ухаалаг шинжилгээ болон усан цэвэрлэгээг нэгтгэсэн шүдний сойзоор амны хөндийн арчилгааны шинэ зах зээлд орж байна.
