“Counter Strike 2”-ийн Монголын “The MongolZ” баг Senzu-г сэлгээнд суулгаснаа зарлалаа
Монголын алдарт “Counter Strike 2” тоглоомын баг “The MongolZ” өөрийн гол тамирчин М.Азбаяр буюу “Senzu”-г нөөцөд шилжүүлэхээ өнгөрсөн шөнө албан ёсоор зарлалаа. Энэ шийдвэр нь цахим спортын ертөнцөд том шуугиан дэгдээсэн бөгөөд тоглогчдын хооронд ярилцсаны эцэст гарсан гэжээ.
Senzu-г сэлгээнд суух хугацаанд “Controlez” буюу Б.Өнөдэлгэр түр орлон тоглоно
Энэ хугацаанд Senzu-ийн орыг “Controlez” буюу Баасанжаргалын Өнөдэлгэр гүйцэтгэхээр болсон байна. Тэр энэ улирлыг дуустал багт тоглох бөгөөд хамгийн ойрхон тэмцээн арваннэгдүгээр сарын 3-9-ний өдрүүдэд БНХАУ-д болох “Intel Extreme Masters Chengdu 2025” тэмцээнд оролцоно. Энэ тэмцээн нь The MongolZ-ийн дараагийн том арга хэмжээ бөгөөд шинэ гишүүнээ турших боломж болно гэж мэргэжилтнүүд үзэж байна.
Б.Өнөдэлгэр – Өмнө нь The MongolZ-д тоглож байсан туршлагатай тоглогч
Өдгөө 28 настай Б.Өнөдэлгэр 2017 оноос хойш “Counter Strike 2” тоглоомын мэргэжлийн түвшинд өрсөлдөж байгаа бөгөөд 2017 оны арваннэгдүгээр сард The MongolZ-д түр хугацаанд оролцож байсан түүхтэй. Түүний хувьд “Chinggis Warriors” багийг ахалж энэ оны эхэнд Дэлхийн Аварга Шалгаруулах Тэмцээн (ДАШТ) буюу “BLAST.tv Austin Major 2025”-д оролцож байсан туршлагатай тамирчин юм. Иймээс түүнийг түр орлуулах нь багтаа тогтвортой байдал авчирна гэж таамаглаж байна.
The MongolZ-ийн удирдлагуудын тайлбар: Академийн тоглогчдыг турших хугацаа хүрэлцэхгүй
The MongolZ багийн удирдлагуудын зүгээс Б.Өнөдэлгэрийг багт түр хугацаанд тоглуулахаар болсон талаар “Академийн багийн тоглогчдын чадавхыг бүрэн үнэлэхэд хангалттай хугацаа байгаагүй тул үндсэн багийн саналыг харгалзан туршлагатай тоглогчийг уг тэмцээнд оролцуулахаар шийдвэрлэлээ” хэмээн цахим хуудсандаа бичжээ. Энэ шийдвэр нь баг том тэмцээнд бэлэн байхад чиглэсэн бөгөөд Senzu-г хэр хугацаанд сэлгээнд суулгах талаар тодорхой мэдээлэл өгөхгүй байгаа нь цаашдын өөрчлөлтийг ч илэрхийлж байна.
