Дэлхийн роботын олимпиад /World Robot Olympiad, WRO/ анх 2004 онд Сингапурт зохион байгуулагдаж байсан түүхтэй. Хоёр арван жилийн дараа тус нэр хүндтэй наадам дахин Сингапур улсад “эргэж ирж”, робот техник, инновацид дурлагсдын дэлхийн хэмжээний уулзвар дахин нээгдлээ.
Сүүлийн жилүүдэд Турк, Герман, Канад, Панам зэрэг олон улсад ээлжлэн зохион байгуулагдаж ирсэн WRO 2025 оны олон улсын шигшээ шатныхаа нээлтийг өчигдөр, 2025 оны арваннэгдүгээр сарын 26-нд Сингапур хотноо хийсэн байна.
91 улсын шилдгүүд “роботын ирээдүй”-н төлөө өрсөлдөж байна
Энэ жил Дэлхийн роботын олимпиадад оролцохоор 91 улсаас 594 баг, нийт 1571 оролцогч бүртгүүлжээ. Тэд сурагч, оюутнуудаас бүрдсэн багуудаараа дамжуулан робот техникийн тусламжтайгаар өдөр тутмын амьдрал, нийгмийн асуудлуудад шинжлэх ухаан, технологийн шийдэл хайх урам зоригийг түгээх зорилготой.
Оролцогчид 8–22 насны хүүхэд, залуусаас бүрдэж байгаа бөгөөд насны ангилал, сонгосон төрлөөсөө хамааран өөр өөр чиглэлээр бүтээлээ танилцуулж, даалгавар биелүүлэх замаар өрсөлдөж байна. WRO International Final 2025-ийн тугны ёслолын үеэр дэлхийн өнцөг булан бүрээс ирсэн багууд нэгэн тайзан дээр цугларч, тэмцээний албан ёсны эхлэлийг харууллаа.
Энэ жилийн үндсэн сэдэв нь “Роботуудын ирээдүй” бөгөөд LEGO суурьтай роботуудыг ашиглан өгөгдсөн даалгаврыг гүйцэтгэх төрөл гол байр суурь эзэлж байна. Даалгаврууд нь зөвхөн техник сборка, программчиллаар хязгаарлагдахгүй, харин бодит амьдралд тулгамдаж буй асуудалтай уялдсан, логик сэтгэлгээ, багийн ажил, бүтээлч сэтгэхүй шаардсан сорилуудаас бүрдэж байгаа юм.
Робот, хүмүүс, ирээдүйн сорилт: Сингапурын байр суурь
Зохион байгуулагчдын хэлж буйгаар энэ удаагийн наадмын зорилго нь роботууд хүн төрөлхтөний амьдралыг хэрхэн илүү аюулгүй, тав тухтай, тогтвортой болгож чадах вэ, мөн дэлхий нийтийн өмнө тулгарч буй томоохон сорилтуудыг шийдвэрлэхэд ямар хэлбэрээр оролцож болохыг судлуулахад чиглэжээ.
Сингапурын Тогтвортой байдал, хүрээлэн буй орчны яам нь энэ жилийн Дэлхийн роботын олимпиадыг зохион байгуулах гол түншээр ажиллаж байна. Тус яамны сайд Грэйс Фү тэмцээний сэдвийн хүрээнд илүү ухаалаг ирээдүйг бүтээхэд ухаалаг технологи, робот техникийг зорилготой, хариуцлагатай нэвтрүүлэхийг оролцогчдод уриалсан байна. Тэрээр Сингапур улсыг роботын судалгаа, хөгжүүлэлт эрчимтэй өрнөж буй бүс нутаг болохыг онцлон дурдсан бөгөөд ялангуяа эрүүл мэндийн салбарыг роботжуулах, автоматжуулах төсөл, санаачилга дээр төр, хувийн хэвшил өндөр түвшинд хамтран ажиллаж буйг хэлжээ.
Сингапур хотод болж буй WRO 2025 нь робот техникийн сонирхогчид, инженер болох мөрөөдөлтэй хүүхдүүд, технологийн ирээдүйг тодорхойлох залуу үеийн хувьд танилцах, өрсөлдөх, суралцах, урам авах том боломж болж байна.
Дэлхийн роботын олимпиад 2025 оны арваннэгдүгээр сарын 26–28-ны өдрүүдэд үргэлжилж, шилдэг бүтээлүүд, ирээдүйн инженерүүдийг тодруулах юм.
