Үндсэн үзүүлэлт ба үнэ
Шинэ MacBook Neo нь iPhone 16 Pro-т ашиглагддаг A18 Pro процессортой болж, 13 инчийн дэлгэцтэйгээр танилцуулагдлаа. Дотоод санах ой нь 512 ГБ хүртэлх хувилбартай, харин үйлдлийн санах ой нь 8 ГБ бөгөөд нэмэгдүүлэх боломжгүй байна. Энэ загварыг Apple өөрийн зөөврийн компьютерийн хамгийн боломжийн үнэтэй хувилбар гэж байршуулж, АНУ-д суурь үнийг 599 ам.доллар, оюутнуудад 499 ам.доллароос эхэлнэ гэж мэдээлжээ.
Шинэ загварын хамгийн их хэлэлцүүлэг дагуулсан сэдэв нь 2026 онд 8 ГБ RAM зөөврийн компьютерт хүрэлцэх эсэх асуудал бөгөөд олон тоймч суурь хэрэглээнд боломжийн гэж үзэж байна.
Өдөр тутмын хэрэглээ, гүйцэтгэлийн туршилтууд
The Verge-ийн Антонио Г. Ди Бенедетто MacBook Neo нь вэб үзэх, бичиг баримт боловсруулах зэрэг зориулалтынхаа өдөр тутмын ажлуудыг төвөггүй гүйцэтгэж байгааг онцолсон байна. Түүний тайлбарласнаар A18 Pro нь нэг цөмт гүйцэтгэлээрээ MacBook Air дахь M1-ээс өндөр үзүүлэлт гаргаж, ижил ангиллын олон Windows төхөөрөмжөөс давсан харагдсан гэжээ. Гэхдээ зарим үед жижиг саатал ажиглагдаж болохыг дурдсан байна. Тухайлбал Dock дээрх “Applications” хавтсыг нээхэд дүрсүүд гарч ирэх хүртэл ойролцоогоор нэг секунд хүлээх тохиолдол байж магадгүй гэж тэмдэглэжээ.
Мөн 8 ГБ RAM болон 256 ГБ хадгалалттай суурь хувилбар нь видео, графикийн зэрэг нөөц их шаарддаг мэргэжлийн ажилд зориулагдаагүй тул ийм хэрэглээнд MacBook Air эсвэл MacBook Pro илүү тохиромжтой хэвээр гэсэн байр суурийг тоймчид давхар хэлсэн байна.
CNET-ийн Метт Эллиотт Geekbench 6 тестээр шалгахад A18 Pro нэг цөмт горимд 3541, олон цөмт горимд 8958 оноо авсан гэж мэдээлжээ. Түүний дүгнэлтээр оргил гүйцэтгэл нь M1-тэй Mac-уудын түвшнээс давж, нэг цөмт үзүүлэлт нь M4-ийн түвшинд дөхсөн нь өдөр тутмын хэрэглээнд хурд мэдрэгдэх боломжтойг харуулж байна.
Хийц, зай барилт, үнэ буулгахын тулд хийсэн хасалтууд
Bloomberg-ийн Крис Уэлч энэ төхөөрөмжийг хөнгөн цагаан их биетэй, дүрс тод дэлгэцтэй, мөн гарын хоёр талаар байрласан хоёр чанга яригчтай гэж онцолсон байна. Түүний үнэлгээгээр гадна төрх, барих мэдрэмжийн хувьд орчин үеийн Mac-ийн чанарын түвшинг хадгалж, угсралт сайтай, өдөр тутмын хэрэглээнд “найдвартай” сонголт болж харагдсан гэжээ.
Tom’s Guide стандарт туршилтаараа (дэлгэцийн 150 кд/м² гэрэлтүүлэгтэй, вэб хуудсуудыг тасралтгүй үзэх нөхцөл) MacBook Neo 13 цаг 28 минут ажилласан гэж мэдээлсэн байна. Үүнийг тухайн үнийн ангилалд өндөр үзүүлэлт гэж үнэлжээ. Харин ижил нөхцөлд Microsoft Surface Laptop Go 3 8 цаг 39 минут ажилладаг, мөн өнөөгийн MacBook Air ойролцоогоор 15 цаг 28 минут ажилладаг гэж харьцуулан дурдсан байна.
Үнийг хамгийн боломжийн түвшинд барихын тулд тодорхой буултууд оржээ. Үүнд 8 ГБ RAM-ийг тогтмол болгосон, суурь хувилбарт Touch ID байхгүй, MagSafe цэнэглэлтгүй, Thunderbolt-ийн оронд удаан USB-C порт ашигласан, мөн гарын арын гэрэлтүүлэггүй зэрэг өөрчлөлтүүд багтсан байна. Гэсэн ч олон тоймчийн ерөнхий дүгнэлтээр MacBook Neo нь энэ үнийн ангилалдаа хүчтэй өрсөлдөгч хэвээр гэж үзжээ.
Fast Company-ийн сэтгүүлч Гарри МакКракен үүнийг “сүүлийн үед Apple-ийн хамгийн амжилттай бүтээгдэхүүнүүдийн нэг; гол шинэчлэл нь шинэ функц бус, боломж ба үнийн зөв тэнцвэр” гэж дүгнэж, боломжийн үнэтэй зөөврийн компьютер хайж буй хэрэглэгчдэд, мөн хүүхэд эсвэл хуучин удаан төхөөрөмж ашиглаж байсан хэрэглэгчдэд тохирох хувилбар гэж тайлбарласан байна.
