Huawei компани эвхэгддэг Pura X загвартаа шинэчлэл хийж, их биеийн хоёр шинэ өнгийг танилцууллаа. Энэ удаад Stylish Orange болон Stylish Purple нэртэй хувилбарууд нэмэгдсэн бөгөөд өмнө нь байсан өнгөний сонголтыг өргөжүүлсэн ч техникийн үзүүлэлтэд ямар нэг өөрчлөлт ороогүй байна.
Шинэ хоёр өнгө хоёулаа олон өнгөний хослол бүхий дизайнтайгаар хийгджээ. Orange хувилбар нь урд хэсэгтээ бараан саарал өнгөтэй, ар талдаа улбар шарын хоёр өөр туяа болон беж өнгийг хослуулсан байна. Харин Purple загвар нь цайвар хүрээтэй бөгөөд арын хэсэгтээ ягаавтар, нил ягаан өнгийн хэд хэдэн туяаг нэг дор нэгтгэснээрээ ялгарчээ.
Эдгээр шинэ өнгийн хувилбарууд зөвхөн нэг л багцтай худалдаанд гарч байгаа аж. Тодруулбал, 16 ГБ үйлдлийн санах ой, 512 ГБ дотоод санах ойтой хувилбараар санал болгож байна. Үнэ нь 7 999 юань буюу ойролцоогоор 1 173 ам.доллартай тэнцэж байгаа юм. Борлуулалт аль хэдийн эхэлсэн бөгөөд тавдугаар сарын 5 хүртэл худалдан авалт хийсэн хэрэглэгчдэд Huawei Care+ үйлчилгээний нэмэлт нэг жилийн эрх дагалдах аж.
Төхөөрөмжийн техникийн үндсэн үзүүлэлтүүд өмнөхтэйгээ ижил хэвээр үлджээ. Уг смартфон нь 3.5 инчийн гадна OLED дэлгэцтэй бөгөөд дэлгэх үедээ 6.3 инчийн үндсэн дэлгэцтэй болдог. Камерын систем нь 50 мегапикселийн үндсэн мэдрэгч, 40 мегапикселийн хэт өргөн өнцгийн модуль, мөн 3.5 дахин оптик томруулалттай телефото линзээс бүрдэж байна.
Бусад онцлогуудын хувьд Wi-Fi 7, NFC, хиймэл дагуулын холбоо, IPX8 стандартын усны хамгаалалт зэрэг боломжуудыг дэмжжээ. Төхөөрөмж Hongmeng OS 5 үйлдлийн систем дээр ажиллах бөгөөд 4720 мАц багтаамжтай батерей, хурдан цэнэглэх дэмжлэгтэй. Харин ашигласан процессорын талаарх мэдээллийг үйлдвэрлэгч одоогоор ил болгосонгүй.
