Gemini зэрэг хиймэл оюуны туслахуудыг зөвхөн асуултад хариулдаг хэрэгсэл гэж ойлгох нь дутуу. Google-ийн Gemini нь тодорхой ажлыг цагийн хуваарийн дагуу давтан гүйцэтгэх, мэдээлэл цуглуулах, өдөр тутмын төлөвлөгөө гаргах зэрэг автомат үйлдлүүдийг хийж чаддаг.
Жишээлбэл, өглөө бүр тухайн өдрийн уулзалтуудаа шалгуулж, хооронд нь зорчиход хэдий хэмжээний хугацаа шаардагдахыг тооцуулах боломжтой. Мөн тодорхой сэдвийн шинэ мэдээллийг өдөр бүр хайлгаж, товч тойм хэлбэрээр авах боломж бий.
Харин Google AI Pro эсвэл Ultra хэрэглэгчдийн хувьд Gemini Spark нь имэйл, календарь зэрэг үйлчилгээнүүдтэй илүү гүн холбогдон ажиллах боломжтой.
Өдөр тутмын ажлыг ингэж автоматжуулж болно
Нэгдүгээрт, Gemini-г өглөө бүр тухайн өдрийн хуваариа шалгадаг болгож болно. Жишээлбэл, “Өдөр бүр 07:30-д миний өнөөдрийн уулзалтуудыг шалгаад, Maps ашиглан нийт зорчих хугацааг тооцоол” гэсэн даалгавар өгч болно.
Ингэхийн тулд календарь, имэйл зэрэг шаардлагатай үйлчилгээнүүд Gemini-тэй холбогдсон байх ёстой. Гэхдээ бодит цагийн замын хөдөлгөөнийг үргэлж бүрэн тооцохгүй байж болох тул гарахын өмнө Maps дээр маршрутаа дахин шалгах нь зүйтэй.
Хоёрдугаарт, Gemini-г өдөр тутмын мэдээний тойм бэлтгэдэг болгож болно. Тодорхой цагт интернетээс нэг сэдвийн шинэ мэдээллийг хайж, хамгийн чухал гэж үзсэн зүйлсийг нэгтгэн өгөх боломжтой.
Жишээлбэл:
“Өдөр бүр 09:00-д Apple-ийн талаарх хамгийн сүүлийн үеийн мэдээг хайж, товч тойм гарга”
гэж тохируулж болно.
Gemini-д нэгэн зэрэг идэвхтэй байлгаж болох хуваарьт үйлдлийн тоо 10 хүртэл байж болох тул хамгийн хэрэгтэй ажлуудаа сонгох нь зөв. Даалгавар дууссаны дараа мэдэгдэл ирдэг.
Гуравдугаарт, амралтын өдрийн төлөвлөгөөг автоматаар гаргуулж болно. Жишээлбэл, Баасан гараг бүр өглөө ойр орчмын шинэ кафе, ресторан, очиж болох газруудаар амралтын өдрийн маршрут санал болгох даалгавар өгч болно.
Хэрэв байршлын зөвшөөрөл өгсөн бол Gemini таны байгаа газрыг ашиглан ойролцоох газруудыг санал болгоно. Гэхдээ хуваарьт үйлдэл үүсгэх үед ашигласан байршлыг дараа нь аялж явах үед автоматаар шинэчлэхгүй байж болзошгүй. Тиймээс өөр хотод байгаа үед төлөвлөгөөг шинэ байршлаар дахин тохируулах шаардлага гарч болно.
Давтагддаг зааврыг нэг удаа тохируулж болно
Gemini-ийн Skills боломж нь байнга давтагддаг заавруудыг хадгалах зориулалттай. Энэ функц нь өмнө ашиглагдаж байсан Gems-ийг орлох чиглэлтэй.
Жишээлбэл, долоо хоног бүр байгууллагын мэдээний товхимол бэлтгэдэг бол компанийн бичгийн хэв маяг, өнгө аяс, нэр томьёо, бүтцийн шаардлагыг нэг Skill болгон тохируулж болно.
Дараа нь шинэ текст бүр дээр урт зааврыг дахин бичих шаардлагагүй. Тухайн Skill-ийг дуудахад өмнө нь тохируулсан дүрмүүд автоматаар үйлчилнэ.
Одоогоор Skill-ийг “/skillname” хэлбэрээр ажиллуулж болох бөгөөд цаашид “@” тэмдэг ашиглан дуудах боломжтой болохоор төлөвлөжээ.
Тавдугаарт, Gemini Spark нь имэйлтэй ажиллах давтагддаг ажлуудыг автоматжуулж чадна. Spark нь Google AI Pro болон Ultra багцын хэрэглэгчдэд зориулсан, төхөөрөмж унтарсан үед ч үргэлжлүүлэн ажиллах боломжтой туслах юм.
Түүнийг Gmail, Calendar, Drive-тэй холбосны дараа долоо хоногийн имэйлүүдийг шалгаж, чухал захидлуудыг товчлон, хийх ажлын жагсаалт үүсгэж, уулзалтын мэдээллийг календарьт нэмэх зэрэг ажлыг гүйцэтгэх боломжтой.
Эдгээр холболтууд анхнаасаа автоматаар идэвхтэй байдаггүй тул тохиргооноос тусад нь зөвшөөрөх шаардлагатай.
Мөн Spark томоохон үйлдэл хийхээсээ өмнө хэрэглэгчээс баталгаажуулалт авах зарчмаар ажилладаг гэж Google тайлбарладаг. Тиймээс чухал имэйл, файл зэргийг хэрэглэгчийн зөвшөөрөлгүйгээр шууд устгах зориулалттай биш.
Гэхдээ Gemini-ийн зарим боломж улс орон, бүс нутгаас шалтгаалан ялгаатай байж болох тул тухайн функц таны бүртгэлд нээлттэй эсэхийг урьдчилан шалгах хэрэгтэй.
Ингэснээр Gemini-г зөвхөн асуулт асуухад бус, өдөр тутмын хуваарь, мэдээлэл, аялал, имэйл, давтагддаг ажлуудаа автоматжуулахад ашиглах боломжтой.
