Netflix 2030 оны FIFA-гийн хөлбөмбөгийн ДАШТ-ийг Испани болон Андоррагийн үзэгчдэд бүрэн дамжуулахаар болжээ. Энэ нь тус платформ уламжлалт эрэгтэйчүүдийн хөлбөмбөгийн ДАШТ-ийг анх удаа шууд дамжуулах тохиолдол болох юм.
Netflix тэмцээний цөөн хэдэн тоглолтыг бус, нийт 104 тоглолтыг бүгдийг нь үзүүлэх эрх авсан байна. Гэхдээ энэхүү эрх зөвхөн Испани болон Андоррагийн нутаг дэвсгэрт үйлчлэх аж.
Өдөр бүр нэг тоглолтыг үнэгүй үзүүлнэ
Орон нутгийн хууль, зохицуулалтыг дагаж Netflix тэмцээний өдөр бүр дор хаяж нэг тоглолтыг үндэсний телевизийн сувгуудаар үнэ төлбөргүй хүргэхээр төлөвлөжээ.
Үүнд Испанийн шигшээ багийн оролцох бүх тоглолт, хагас шигшээ хоёр тоглолт болон финал багтана. Харин бусад тоглолтыг үзэхийн тулд Netflix-ийн төлбөртэй эрх шаардлагатай байх юм.
Тоглолтын шууд дамжуулалтаас гадна Netflix тоглолт эхлэхийн өмнөх нэвтрүүлэг, завсарлагын үеийн студийн хөтөлбөр, тоглолтын дараах дүн шинжилгээ зэргийг үзэгчдэд хүргэнэ.
Мөн тоглолттой өдөр бүр тухайн өдрийн гол үйл явдал, үр дүнг нэгтгэсэн тусгай тойм нэвтрүүлэг гаргахаар төлөвлөсөн байна.
Ингэснээр Netflix зөвхөн тоглолт үзүүлэх бус, ДАШТ-ий үеийн иж бүрэн спортын контентын багц санал болгох болж байна.
Netflix сүүлийн жилүүдэд FIFA-тай хамтын ажиллагаагаа өргөжүүлж байгаа бөгөөд өмнө нь 2027 болон 2031 оны эмэгтэйчүүдийн хөлбөмбөгийн ДАШТ-ийг АНУ-д дамжуулах эрхийг мөн авсан юм.
2030 оны гэрээ нь Netflix спортын шууд дамжуулалтын салбарт байр сууриа улам хүчтэй тэлж байгааг харуулж байна.
