Meta корпорацын үүсгэн байгуулагч Марк Цукерберг хиймэл оюун ухааны ирээдүйн хөгжлийн талаарх өөрийн байр суурийг тусгасан манифест нийтэлжээ. Энэ талаар Axios портал мэдээлсэн байна.
Цукербергийн үзэж буйгаар, нийгэмд учирч болох хамгийн том аюул нь хиймэл оюун ухаан нэг байгууллага эсвэл нэг улсын хэт их хяналтад орох явдал аж.
Нэг төвд хэт их эрх мэдэл төвлөрөхийг эрсдэл гэж үзжээ
“Хамгийн том эрсдэл нь нэг засгийн газар эсвэл байгууллага энэ технологид хэт их эрх мэдэлтэй болох явдал” гэж баримт бичигт дурдсан байна.
Meta-ийн тэргүүн хиймэл оюун ухаантай холбоотой түгээмэл айдсууд зарим талаар хэтрүүлсэн бөгөөд энэ технологийн өгч болох эерэг боломжуудыг бүрэн тооцдоггүй гэж үзжээ. Түүний хэлснээр, хиймэл оюун ухааны ирээдүй эрх чөлөө, нээлттэй судалгаа, өрсөлдөөн болон боломжийн тэгш хүртээмж дээр суурилах ёстой.
Манифестэд мөн АНУ болон ардчилсан орнууд энэ салбарт тэргүүлэх шаардлагатайг онцолсон байна. Ингэснээр хүн төрөлхтөн “супер оюун ухаан”-д тавих хяналтаа хадгалж чадна гэж Цукерберг үзэж байгаа аж.
Meta AI хэрэгслүүдээ олон нийтэд хүртээмжтэй болгоно
Цукерберг хэт их зохицуулалт нь Америкийн хиймэл оюун ухааны загваруудын хөгжлийг удаашруулж, бусад улс оронд технологийн давуу тал олгох эрсдэлтэй гэж анхааруулжээ.
Meta-ийн тэргүүн компанийнхаа зорилгыг хиймэл оюун ухааны дэвшилтэт хэрэгслүүдийг өргөн хүрээний хэрэглэгчдэд хүртээмжтэй болгох гэж тодорхойлсон байна. Мөн ирээдүйн Meta AI агентууд хэрэглэгчийн мэдээллийг илүү өндөр түвшинд хамгаалах ёстой гэж тэр хэлжээ.
Түүний дурдсанаар, бүрэн хувийн горим бий болж болох бөгөөд ийм үед хөгжүүлэгч компани өөрөө ч хэрэглэгчийн мэдээлэлд нэвтрэх боломжгүй байх ёстой.
Өмнө нь Business Insider-ийн мэдээлснээр, OpenAI-ийн гүйцэтгэх захирал Сэм Альтман хиймэл оюун ухааны хөгжил “сингуляр цэг”-т хүрсэн гэж мэдэгдсэн. Энэ нь технологийн дэвшил огцом хурдасч, нийгэмд томоохон өөрчлөлт авчрах үе гэж тайлбарлагддаг. Альтман мөн хиймэл оюун ухааны цаашдын хөгжил дэлхий нийтэд эерэг нөлөө үзүүлж магадгүй гэж хэлжээ.
