Samsung-ийн ухаалаг утаснуудад үе шаттайгаар хүргэж буй Android 17-д суурилсан One UI 9 шинэчлэлтэй холбоотой шинэ гомдлууд гарчээ. Программын шинэ хувилбарыг суулгасан зарим Galaxy хэрэглэгч Wi-Fi болон мобайл интернэтийн доголдолтой тулгарсан байна. Асуудал хэд хэдэн загварт илэрсэн талаар BGR Android Authority-ийн мэдээллийг эшлэн мэдээлжээ.
Wi-Fi холбогдсон ч удалгүй тасарч байна
Хэрэглэгчдийн тайлбарласнаар, утас Wi-Fi сүлжээнд түр холбогдоод салж, холболтын алдаа зааж байгаа аж. Ийм доголдол гарсан гэх мэдээлэлд Galaxy S24, S24+, S25 Ultra, Z Flip 7, Z Fold 8 болон Galaxy A55 загварууд дурдагджээ.
Мөн мобайл дата ажиллахгүй байгаа тухай гомдол гарсан байна. Тухайлбал, Galaxy S24, S25, S26 Ultra, A16, A17 загварын зарим эзэмшигч мобайл сүлжээгээр интернэтэд холбогдож чадахгүй байгаагаа мэдээлжээ. Гэхдээ тэдний заримынх нь Wi-Fi хэвийн ажиллаж байгаа аж.
Зарим хэрэглэгч түр шийдэл олсон ч бүх загварт тохирохгүй
Galaxy Z Flip 7 ашигладаг зарим хүнд Connectivity Labs-ийн хөгжүүлэгчийн тохиргооноос Wi-Fi 7 горимыг унтраах нь тус болсон байна. Гэвч энэ арга бүх төхөөрөмжид үр дүн өгөөгүй тул нийтлэг шийдэл одоогоор олдоогүй гэж мэдээлжээ.
Эх мэдээлэл нийтлэгдэх үед Samsung уг асуудлаар албан ёсны тайлбар өгөөгүй, засварын шинэчлэл хэзээ гаргахыг ч зарлаагүй байв. Иймээс доголдолд өртсөн хэрэглэгчид дараагийн программын шинэчлэлийг хүлээх шаардлагатай болж магадгүй байна.
Батарейн зарцуулалтын гомдол дээр холболтын асуудал нэмэгджээ
Өмнө нь Galaxy хэрэглэгчид One UI 9 суулгасны дараа батарейн цэнэг ердийнхөөс хурдан дуусдаг болсон талаар гомдол гаргаж байжээ. Харин одоо утасгүй холболт болон мобайл дата тасалдах асуудал нэмэгдсэн байна.
Интернэт тогтворгүй болох нь өдөр тутмын хэрэглээнд хүндрэл учруулж, сүлжээ шаарддаг зарим аппликейшн, үйлчилгээг ашиглах боломжийг хязгаарлаж байгаа аж.
