Хэт хүйтэн температур ухаалаг утасны ажиллагаанд сөргөөр нөлөөлж, батарей хурдан суух, төхөөрөмж гэнэт унтрах зэрэг асуудал үүсгэж болдог. Иймээс өвлийн улиралд смартфоноо зөв ашиглах хэд хэдэн энгийн дүрмийг мөрдөхийг мэргэжилтнүүд зөвлөжээ.
Германы CHIP хэвлэлийн мэдээлснээр утсаа хүйтнээс хамгаалах хамгийн энгийн арга нь өвлийн хүрэмний дотор талын халаасанд, биедээ ойр авч явах юм. Ингэснээр төхөөрөмжийн температурыг харьцангуй тогтвортой хадгалж, ажиллагааны доголдлын эрсдэлийг багасгах боломжтой байна.
Хүйтэнд батарейн ажиллагаа яагаад мууддаг вэ
Ихэнх орчин үеийн смартфонд литий-ионы батарей ашигладаг. Температур буурахад батарейн доторх электрохимийн процесс удааширч, дотоод эсэргүүцэл нь нэмэгддэг байна.
Үүний улмаас утасны цэнэг ердийнхөөс хурдан багасах эсвэл дэлгэц дээр хангалттай цэнэг үлдсэн мэт харагдаж байсан ч төхөөрөмж гэнэт унтарч болно.
Ихэнх тохиолдолд ийм унтралт нь батарей бүрэн эвдэрсэн гэсэн үг биш аж. Төхөөрөмжийг аажмаар хэвийн температурт оруулсны дараа ажиллагаа нь ихэвчлэн сэргэдэг байна.
Гадаа байхдаа утсаа аль болох бага гаргах хэрэгтэй
Удаан хугацаагаар хүйтэнд байх үед смартфоноо халааснаасаа байнга гаргахгүй байхыг мэргэжилтнүүд зөвлөжээ.
Утасны дуудлага хийх, хөгжим эсвэл подкаст сонсох шаардлагатай бол утсаа дулаан халаасанд нь үлдээн, утасгүй чихэвч ашиглах нь илүү тохиромжтой аж.
Хэрэв төхөөрөмж хүйтэнд унтарсан бол шууд асаах гэж оролдохгүй байх хэрэгтэй. Харин унтраасан хэвээр нь дулаан өрөөнд оруулж, аажмаар халтал нь хүлээх шаардлагатай байна.
CHIP-ийн зөвлөмжөөр энэ үйл явцад ихэвчлэн 30-60 минут хангалттай байдаг аж.
Огцом халаах нь аюултай
Мэргэжилтнүүд хүйтэн смартфоныг халаалтын радиатор дээр тавих, үс хатаагчаар үлээлгэх зэрэг огцом халаах аргыг хэрэглэхгүй байхыг анхааруулжээ.
Мөн хөлдөж хөрсөн төхөөрөмжийг гаднаас орж ирмэгц нь шууд цэнэглэгчид холбохыг зөвлөдөггүй байна.
Температур огцом өөрчлөгдөх үед төхөөрөмжийн дотор конденсат үүсэж, чийг нь электрон эд ангиудад гэмтэл учруулж болзошгүй аж.
Дэлгэцийн ажиллагаанд ч нөлөөлдөг
Хүйтэн температур зөвхөн батарейд бус, смартфоны дэлгэцэд ч нөлөөлж болно.
Температур буурахад дэлгэц мэдрэгчтэй үйлдэлд удаан хариулах, гэрэлтүүлэг багасах, өнгө дамжуулалт хэвийн бус болох тохиолдол гардаг байна.
Ихэнх смартфоны зөвлөмжит ажиллах температур ойролцоогоор 0-ээс +35 хэмийн хооронд байдаг. Гэхдээ бодит хязгаар нь загвар бүрээс шалтгаалдаг тул үйлдвэрлэгчийн техникийн зааврыг шалгах шаардлагатай аж.
