Смартфон дээр суулгасан аппликэйшнүүдээ удаан хугацаанд шинэчлэхгүй байх нь зөвхөн шинэ боломжуудаас хоцрох асуудал биш юм. Хуучирсан хувилбарууд нь төхөөрөмжийн аюулгүй байдал болон хэрэглэгчийн хувийн мэдээлэлд бодит эрсдэл үүсгэж болзошгүй гэж BGR онцолжээ.
Аппын шинэчлэлт бүр зөвхөн дизайн өөрчлөх, шинэ функц нэмэх зорилготой байдаггүй. Ихэнх тохиолдолд хөгжүүлэгчид өмнөх хувилбарт илэрсэн аюулгүй байдлын сул тал, алдаа, доголдлыг шинэчлэлтээр засдаг.
Хэрэв тухайн программд ноцтой эмзэг байдал илэрсэн байхад хэрэглэгч хуучин хувилбарыг үргэлжлүүлэн ашиглавал халдагчид уг сул талыг ашиглах боломж нэмэгддэг.
Ийм төрлийн эмзэг байдлаар дамжуулан хэрэглэгчийн аккаунтын мэдээлэл, мессеж, зураг, нууц үг болон бусад хувийн өгөгдөлд нэвтрэх эрсдэл гарч болно.
АНУ-ын Cybersecurity and Infrastructure Security Agency буюу CISA ч аюулгүй байдлын чухал шинэчлэлтүүдийг аль болох хурдан суулгахыг зөвлөдөг.
Хуучин апп зөвхөн аюулгүй байдлын асуудал үүсгэдэггүй
Шинэчлэлт суулгахгүй удах нь техникийн өөр төрлийн хүндрэл ч авчирч болно.
Аппликэйшнүүдийн хуучин хувилбар шинэ серверийн функцүүдтэй нийцэхээ больж, аажмаар хэвийн ажиллахгүй болох боломжтой. Ингэснээр программ удаашрах, байнга гацах, зарим үйлдэл ажиллахгүй болох эсвэл бүр нээгдэхээ болих тохиолдол гарч болно.
Ялангуяа сервертэй байнга холбогдож ажилладаг программуудад энэ асуудал илүү түгээмэл.
Үүнд:
- мессенжер;
- сошиал сүлжээ;
- банкны апп;
- cloud үйлчилгээ;
- стриминг платформ;
- онлайн тоглоом
зэрэг үйлчилгээ багтана.
Ийм төрлийн аппуудын арын систем байнга шинэчлэгддэг учраас компаниуд хэт хуучин хувилбаруудыг дэмжихээ тодорхой хугацааны дараа зогсоодог.
Үйлдлийн систем хуучирвал асуудал улам нэмэгдэнэ
Зөвхөн апп биш, Android эсвэл iOS-ийн хувилбар хэт хуучирсан тохиолдолд ч хэрэглэгч аажмаар шинэ программуудаас хоцорч эхэлдэг.
Шинэ аппликэйшнүүд болон шинэчлэлтүүд тодорхой Android эсвэл iOS хувилбараас дээш систем шаардах нь түгээмэл.
Хэрэв смартфон үйлдвэрлэгчээсээ системийн шинэчлэлт авахаа больсон бол шинэ хувилбарын апп суулгах боломж хумигдана. Улмаар зарим үйлчилгээ тухайн төхөөрөмж дээр бүрэн ажиллахаа больж болно.
Ийм үед түр хугацааны шийдэл болгон тухайн үйлчилгээний веб хувилбарыг браузераар ашиглаж болох ч бүх функц апптай адил ажиллахгүй байх магадлалтай.
Ямар аппыг хамгийн түрүүнд шинэчлэх хэрэгтэй вэ
Хэрэглэгчийн хувийн болон санхүүгийн мэдээлэлтэй шууд ажилладаг программуудад хамгийн их анхаарах шаардлагатай.
Тухайлбал банкны апп, password manager, мессенжер, cloud хадгалалт болон имэйлтэй холбоотой программуудын аюулгүй байдлын шинэчлэлтийг удаан хойшлуулах нь илүү өндөр эрсдэлтэй.
Хамгийн энгийн арга нь Google Play Store эсвэл App Store дээр автомат шинэчлэлтийг идэвхжүүлэх явдал юм.
Хэрэв автомат шинэчлэлт ашиглахыг хүсэхгүй байгаа бол тогтмол хугацаанд шинэ хувилбар байгаа эсэхийг гараар шалгаж болно.
Аппуудаа шинэчилж байх нь зөвхөн шинэ функц ашиглахын төлөө биш. Энэ нь смартфоны тогтвортой ажиллагаа, аккаунтын хамгаалалт болон хувийн мэдээллийн аюулгүй байдлыг хадгалах үндсэн арга хэмжээнүүдийн нэг юм.
