Барилгын дээвэр дээрх нисдэг тэрэгний буудлаас Улаанбаатар хот бүхэлдээ харагдана: гэр хороолол өндөр шилэн барилгуудтай сүлэлдэж, хотын захаас уудам тал үргэлжилнэ. Чухам энэ өндөрлөгөөс The MongolZ баг шинэ аяныхаа дүрс бичлэгээр дамжуулан эх орноо дэлхийн тавцанд сурталчилж байна.
Монголын телевизийн суваг, киноклубүүд болон хотын томоохон дэлгэцүүдээр цацагдаж буй тус видео нь ямар ч тэмцээний тавцанд тоглож, аль ч улсад өглөөг угтсан бай, таны үндэс угсаа, гарвал таньтай хамт үлддэг гэдгийг санагдуулна.
The MongolZ багийнхан тэмцээнээс тэмцээний хооронд нисэх онгоцны буудал, буудлуудаар амьдардаг ч олон улсын тавцанд гарах бүр нь Монгол орныг хараахан мэдэхгүй хүмүүст танилцуулах шинэ боломж болдог.
Тэдний шинэ санаачилгын талаар The MongolZ багийнхан дараах зүйлсийг онцолж байна:
- Үндэс угсаагаа санах нь та бүхний хувьд хувь хүний үүднээс юуг илэрхийлэх вэ? Энэ бол маш энгийн зүйлсээс эхэлдэг. Зочин ирэхэд гэртээ ширээ засах заншил, эргэн тойронд англиар ярьж байхад бэлтгэлийн бааз дээрээ хоорондоо монголоор ярилцах агшин гээд л. Өөр тивд явж байхдаа монгол хэл сонсвол бид шууд л эргээд хардаг. Үндэс сууриа санана гэдэг нь тусгайлан боддог зүйл биш ч тоглолт бүрт бидэнтэй хамт байдаг тийм нэг мэдрэмж юм.
- The MongolZ-ийн амжилт та бүхнийг дэлхий дахинд Монгол орны нүүр царай, дуу хоолой болгосон гэж боддог уу? Бид асар том хариуцлагыг мэдэрдэг. Эх орон нэгтнүүд, олон улсын хамтрагчид, найз нөхөд маань биднийг тогтмол дэмждэг. Үүнийг дагаад бүх дэлхий биднийг харж байгаа гэдгийг ухамсарладаг. Бид эх орныхоо дуу хоолой болохоор тусгайлан төлөвлөөгүй ч нэгэнт ийм хувь тавилан оногдсон тул нэр төртэй төлөөлөхийг хүсдэг.
- Өнөөдөр The MongolZ багаар дамжуулан дэлхий ертөнц Монголыг хэрхэн харж байна вэ? Орчин үеийн, эрч дүүрэн улс гэж харж байна. Олон хүмүүс Монголыг зөвхөн адуун сүрэг, уудам тал, гэр хорооллоор төсөөлдөг хэвээр. Энэ бол бидний нэг хэсэг бөгөөд бид үүгээрээ бахархдаг. Гэвч бидэнд амьдрал нь буцалсан том хотууд, дэлхийн өндөр түвшинд өрсөлддөг залуус байна. Бид орчин үеийн Монголын энэхүү хоёр талыг хоёуланг нь дэлхийд харуулахыг зорин ажиллаж байна.
- Яагаад яг одоо өөрсдийн үндэс суурь, эх орноо эргэн дурсах нь чухал байв? Бид бараг цаг үргэлж замд явдаг — тэмцээн, нисэлгүүд, дахин тэмцээн. Бид түр хэмнэлээ сааруулан эх орондоо ирж, өссөн орчноо дэлхийд харуулахыг хүссэн юм. Энэ бол хаанаас эхэлснээ өөрсдөдөө болон хөгжөөн дэмжигчиддээ санагдуулах сайхан боломж байлаа.
- Сүүлийн үед та бүхний хувьд “гэр” гэдэг ойлголт өөрчлөгдсөн үү? Тийм ээ. Урьд нь “гэр” гэдэг нь тодорхой нэг байршил — бидний гэр, гудамж, хот байсан. Одоо жилийн турш аялж байгаа болохоор манай баг хамтдаа байгаа газар бүхэн бидний гэр болжээ. Гэсэн хэдий ч урт аяллын дараа эх орондоо эргэн ирэхийн үнэ цэнийг илүү ихээр мэдэрдэг.
- The MongolZ багийг урагш тэмүүлүүлдэг монгол хүний онцлог чанар байдаг уу? Тэвчээр ба хатуужил. Бид цаг агаарын хатуу уур амьсгал, уудам орон зайд дассан тул (инээв) хүнд хэцүү үед шантралгүй, тэвчээртэй хүлээж чаддаг.
- The MongolZ баг Монголын шинэ үеийнхэнд юуг илэрхийлж байна гэж бодож байна вэ? Бид хэн ч бай өөрийн гэсэн онцлогоо алдалгүйгээр дэлхийн тавцанд гарч чадна гэдгийн баталгаа болохыг хүсдэг. Залуус биднээс урам зориг авч, мөрөөдөлдөө итгэж эхэлбэл бидний хийж буй зүйл зорилгодоо хүрч байна гэсэн үг.
- Энэхүү аян “ДЭЛХИЙ ЭНДЭЭС ЭХЭЛНЭ” гэсэн нэртэй. Та бүхний хувьд дэлхий ертөнц хаанаас эхэлдэг вэ? Монголоос. Анхны тоглолтоо энд хийж, анхны хөгжөөн дэмжигчид маань биднийг энд л дэмжсэн бөгөөд анхны тэмцээндээ ч эндээс мордсон. Дараагийн бүх амжилт эндээс л эхтэй. Тэгэхээр бидний хувьд дэлхий яг эндээс, эх гэрээс минь эхэлдэг.
