Grand Theft Auto VI худалдаанд гарахаасаа өмнө урьдчилсан захиалгаар нэг тэрбум гаруй ам.доллар төвлөрүүлсэн байж болзошгүй байна. Sensor Tower шинжилгээний компанийн тооцоогоор захиалгын хэмжээ ойролцоогоор 10.31 сая хувьтай тэнцэж байгаа талаар GamesBeat мэдээлжээ.
Нээлт арваннэгдүгээр сарын 19-нд товлогджээ
GTA 6-г PlayStation 5 болон Xbox Series X/S платформд арваннэгдүгээр сарын 19-нд гаргахаар төлөвлөсөн байна. Take-Two Interactive тоглоомын эрэлт маш өндөр байгааг баталсан ч урьдчилсан захиалгын нарийвчилсан тоог зарлаагүй аж.
Харин дижитал хувилбар худалдан авсан хэрэглэгчид тоглоомоо урьдчилан татах боломжтой болсон гэж мэдээлжээ. Файлын хэмжээ ойролцоогоор 207.7 ГБ байна.
Томоохон тоглоомын нээлт ажлын ирцэд нөлөөлдөг
Deputy компанийн мэдээллээр, алдартай тоглоом худалдаанд гарах үеэр АНУ-ын ээлжийн ажилтнуудын ажил таслах үзүүлэлт бараг есөн хувиар нэмэгддэг аж.
Энэ өөрчлөлт зочлох үйлчилгээний салбарт хамгийн тод илэрч, 32.4 хувийн өсөлт бүртгэгджээ. Харин жижиглэн худалдаанд 14.5 хувиар нэмэгдсэн байна.
Зарим ажилтан тоглоомоо татаж бэлтгэхийн тулд нээлтээс нь нэг өдрийн өмнө ажилдаа ирэхгүй байх тохиолдол ч нэмэгддэг гэжээ.
Эхний жилд 30–35 сая хувь борлуулах төлөвтэй
Enders Analysis-ийн шинжээчид GTA 6 нээлтээсээ хойших эхний жилд 30–35 сая хувь борлогдох боломжтой гэж үзэж байна. Онцгой амжилттай нөхцөлд энэ тоо 50–60 саяд хүрч болох аж.
Мөн GTA Online нь нээлтийн дараах орлогын чухал эх үүсвэр болж, тоглогчдын тогтмол худалдан авалтыг дэмжинэ гэсэн хүлээлттэй байна.
Үүний зэрэгцээ санах ойн чипийн хомсдолоос үүдэн консолын үнэ өсөж, тоглоомын зах зээлд нэмэлт дарамт үүсжээ. Гэсэн ч Sony байр сууриа бэхжүүлсээр байгаа аж. PlayStation 5-ийн нийт борлуулалт 100 сая төхөөрөмжид ойртож, шинжээчдийн үнэлгээгээр Sony Microsoft-оос ойролцоогоор дөрөв дахин олон консол борлуулж байна.
