Утас, таблет, зөөврийн компьютерийн батарей ашиглалтын явцад аажмаар элэгддэг. Гэвч өдөр тутмын зарим дадал энэ үйл явцыг түргэсгэж болзошгүй юм. Хэт халалт, цэнэгийг бүрэн дуусгах, удаан хугацаанд дүүрэн цэнэгтэй байлгах нь орчин үеийн батарейн насжилтад сөргөөр нөлөөлдөг талаар GIGA мэдээлжээ.
Халуун орчин, цэнэглэж байх үеийн ачаалал
Лити-ион батарейн элэгдлийг нэмэгдүүлдэг гол хүчин зүйлсийн нэг нь өндөр температур юм. Төхөөрөмжийг нарны шууд тусгалд, халаагуурын дэргэд эсвэл халуунд зогссон автомашинд үлдээхээс зайлсхийхийг тус нийтлэлд зөвлөсөн байна.
Цэнэглэж байхдаа өндөр ачаалалтай тоглоом тоглох нь ч нэмэлт дулаан үүсгэдэг. Цэнэглэлт болон процессорын ачаалал давхцахад төхөөрөмж илүү халж, батарейд таагүй нөхцөл бүрдэнэ.
Мөн утсаа унтартал нь цэнэггүй болгох, эсвэл 100 хувьд хүрсний дараа удаан хугацаанд дүүрэн цэнэгтэй байлгах нь зохимжгүй дадалд тооцогдож байна. Гэхдээ орчин үеийн төхөөрөмжүүд цэнэг дүүрэхэд тэжээлийг удирддаг тул энэ нь тасралтгүй хэт цэнэглэгдэнэ гэсэн үг биш юм.
Тогтмол залгуурт холбоотой ашигладаг зөөврийн компьютерт цэнэгийг 80 хувиар хязгаарлах боломж байвал идэвхжүүлэхийг зөвлөжээ.
Хүйтнээс оруулсан утсаа шууд цэнэглэхгүй
Хүйтэн орчин батарейн ажиллагаанд мөн нөлөөлнө. Хасах температурт утасны цэнэг хурдан буурч, заримдаа гэнэт унтарч болно. Ихэнх тохиолдолд энэ нь түр зуурын өөрчлөлт бөгөөд дулаан орчинд орсны дараа ажиллагаа хэвийн болдог байна.
Харин хүйтэнд байсан төхөөрөмжийг шууд цэнэглэхгүй, өрөөний температурт хүртэл дулаацсаны дараа залгах нь чухал юм.
Удаан хадгалахдаа цэнэгийг нь тал орчимд үлдээнэ
Арын горимд ажиллаж, их эрчим хүч зарцуулдаг аппликейшнүүдийг шалгах нь цэнэгийн хэрэглээг бууруулахад тустай. Ингэснээр шаардлагагүй ачаалал, ойр ойрхон цэнэглэх хэрэгцээг багасгаж болно.
Төхөөрөмжөө удаан хугацаанд ашиглахгүй хадгалах бол батарейг ойролцоогоор 40–60 хувийн цэнэгтэй үлдээхийг зөвлөжээ.
Мөн Android төхөөрөмжид дасан зохицох цэнэглэлт дэмжигддэг бол идэвхжүүлэх боломжтой. Энэ функц хэрэглэгчийн өдөр тутмын хуваарьт тулгуурлан цэнэглэх явцыг тохируулж, батарей дүүрэн цэнэгтэй өнгөрүүлэх хугацааг багасгахад тусалдаг байна.
