Apple iOS 27-д зориулан томоохон шинэчлэлт бэлтгэж байгаа бөгөөд хамгийн сонирхол татаж буй өөрчлөлтүүдийн нэг нь “Shortcuts” буюу “Шуурхай командууд” апптай холбоотой байж магадгүй байна. Bloomberg-ийн мэдээлснээр Apple хэрэглэгчдэд автоматжуулалтыг энгийн текстээр тайлбарлан үүсгэх боломж олгохоор ажиллаж байгаа аж.
Одоогоор “Shortcuts” апп нь визуал редактор дээр суурилсан бөгөөд олон хэрэглэгчид үүнийг ойлгоход төвөгтэй, гараар тохируулахад цаг их шаарддаг гэж үздэг. Харин iOS 27-д хэрэглэгч хийхийг хүссэн үйлдлээ энгийнээр бичихэд систем өөрөө бэлэн автоматжуулалт үүсгэх боломжтой болох төлөвтэй байна.
Жишээлбэл, хэрэглэгч iPhone-оос тодорхой цагт хөгжим автоматаар асаах, “Do Not Disturb” горим идэвхжүүлэх, эсвэл тодорхой үед мессеж илгээх команд үүсгэхийг текстээр хүсэж болох юм. Ингэснээр өмнө нь зөвхөн туршлагатай хэрэглэгчид идэвхтэй ашигладаг байсан “Shortcuts” илүү өргөн хүрээнд хэрэглэхэд хялбар болно.
Apple тексттэй ажиллах AI хэрэгслүүдээ сайжруулна
iOS 27-д “Writing Tools” буюу Apple-ийн текст боловсруулах хиймэл оюун ухааны хэрэгслүүд мөн шинэчлэгдэх төлөвтэй байна. Шинэ хувилбарт Grammarly-тэй төстэй дүрэм, найруулгын шалгалт нэмэгдэж магадгүй аж.
Систем засварын саналуудыг тусгай цэсэнд харуулж, хэрэглэгч бүрийг нь тусад нь зөвшөөрөх эсвэл үл тоох боломжтой болно. Энэ нь имэйл, тэмдэглэл, мессеж, баримт бичиг бичих үед текстийн алдааг илүү ойлгомжтой засахад туслах юм.
AI ашиглан ханын зураг бүтээх боломж нэмэгдэнэ
Шинэчлэлтийн бас нэг хэсэг нь хиймэл оюун ухаанаар ханын зураг үүсгэх функц байх төлөвтэй байна. Хэрэглэгчид Image Playground-оор дамжуулан iPhone-ийн нүүр дэлгэц болон түгжээний дэлгэцэд зориулсан зураг бүтээх боломжтой болох аж.
Ийм төрлийн функцууд Google болон Samsung-ийн смартфонуудад өмнө нь нэвтэрсэн байсан бол Apple өөрийн хувилбарыг iOS 27-д бэлтгэж байгаа бололтой.
Эдгээр шинэ боломжууд нь Apple Intelligence-ийн удаашрал, “ухаалаг” Siri-ийн хойшлолттой холбоотой шүүмжлэлийн дараах Apple-ийн илүү өргөн AI шинэчлэлтийн нэг хэсэг байх магадлалтай. Албан ёсны танилцуулгыг WWDC 2026 дээр хийхээр хүлээгдэж байна.
