Samsung-ийн шинэ Galaxy SmartTag 3 байршил тогтоогчийн чанартай зургууд цахим орчинд гарчээ. Зургуудаас харахад тус компани өмнөх SmartTag 2-оос эрс өөр, илүү авсаархан хийц сонгосон байна.
Шинэ загвар сунгасан хэлбэрээс татгалзаж, булангууд нь дугуйрсан жижиг дөрвөлжин биетэй болжээ. Ерөнхий төрх нь Samsung-ийн зарим Galaxy Watch загварын дизайныг санагдуулах бөгөөд хар, цагаан хоёр өнгийн хувилбар зурагт харагдсан байна.
Түлхүүрийн оосрын нүх байхгүй болжээ
Galaxy SmartTag 3-ийн хамгийн том өөрчлөлтүүдийн нэг нь бэхэлгээний хийц аж.
SmartTag 2 дээр байсан түлхүүрийн оосор эсвэл ремень хийх суурилуулсан нүх шинэ загварт харагдахгүй байна. Үүний оронд Samsung карабинтай тусгай гэрийг тусад нь худалдаалах төлөвтэй байгаа гэж мэдээлжээ.
Мөн силикон, арьсан болон хамгаалалтын гэрүүдээс гадна гэрийн тэжээвэр амьтны хүзүүвчинд бэхлэх зориулалттай тусгай дагалдах хэрэгсэл гарч магадгүй байна.
Bluetooth LE болон UWB дэмжинэ
Задарсан мэдээлэл болон FCC-ийн баримтуудад Galaxy SmartTag 3 нь Bluetooth LE болон Ultra-Wideband буюу UWB технологийг дэмжихээр дурдагджээ.
UWB нь ойрын зайд төхөөрөмжийн байршлыг илүү нарийвчлалтай тодорхойлоход ашиглагддаг. Иймээс хэрэглэгч алдагдсан эд зүйлээ ойр орчимд хайх үед чиглэл болон зайг илүү нарийн тогтоох боломжтой болох төлөвтэй байна.
Төхөөрөмжийн хэмжээ ойролцоогоор 30 × 30 мм, зузаан нь 10 мм-ээс бага байх магадлалтай аж.
Аравдугаар сард танилцуулж магадгүй
Galaxy SmartTag 3-ыг Samsung аравдугаар сарын эхээр танилцуулж магадгүй гэсэн мэдээлэл байна. Гэхдээ компани одоогоор албан ёсны нээлтийн өдрийг зарлаагүй байна.
АНУ-д нэг ширхэг SmartTag 3 ойролцоогоор 30 ам.доллар, дөрвөн ширхэгтэй багц 100 ам.долларын үнэтэй байж магадгүй гэж таамаглажээ.
Европын зах зээлд нэг төхөөрөмж ойролцоогоор 28 евро, дөрвөн ширхэгтэй багц 93 евро орчим үнэлэгдэх боломжтой байна.
Одоогоор эдгээр үнэ болон нээлтийн хугацаа албан ёсоор баталгаажаагүй бөгөөд задарсан мэдээлэлд тулгуурласан таамаг хэвээр байна.
