Android ухаалаг гар утсанд хэрэглэгчийн өдөр тутмын хэрэглээг илүү тайван, цэгцтэй, хурдан мэт мэдрэмжтэй болгох хэд хэдэн тохиргоо байдаг. Эдгээр нь процессорын бодит хүчин чадлыг нэмэгдүүлэхгүй ч илүүдэл хөдөлгөөнт дүрслэл, мэдэгдэл болон арын ажиллагааг багасгаснаар интерфэйсийн хариу үйлдэл илүү шуурхай санагдахад тусалдаг.
Шинэ аппыг үндсэн дэлгэц дээр автоматаар нэмэхийг зогсоох
Шинээр суулгасан апп бүрийн дүрсийг үндсэн дэлгэц дээр автоматаар байрлуулах тохиргоог унтраах нь хамгийн энгийн өөрчлөлтүүдийн нэг.
Ялангуяа олон апп туршиж суулгадаг хэрэглэгчдийн хувьд home screen богино хугацаанд дүүрч, хэрэгтэй зүйлээ олоход төвөгтэй болдог. Энэ функцийг идэвхгүй болгосноор шинэ аппууд зөвхөн аппын жагсаалтад үлдэж, үндсэн дэлгэц илүү цэвэрхэн харагдана.
Анимацийн хурдыг багасгавал интерфэйс илүү шуурхай санагдана
Android-ийн цонх нээгдэх, дэлгэц солигдох болон бусад хөдөлгөөнт дүрслэлийн хугацааг богиносгох боломжтой.
Ихэнх төхөөрөмж дээр энэ тохиргоо Developer options буюу хөгжүүлэгчийн цэс дотор байдаг. Уг цэсийг идэвхжүүлэхийн тулд утасны мэдээлэл хэсэгт байрлах Build number дээр хэд хэдэн удаа дарах шаардлагатай байдаг.
Дараа нь Window animation scale, Transition animation scale зэрэг үзүүлэлтийг багасгаж болно. Ингэснээр цэс, апп хооронд шилжих хөдөлгөөн хурдан болж, утас бүхэлдээ илүү түргэн ажиллаж байгаа мэт мэдрэмж төрүүлнэ.
Гэхдээ энэ нь процессорын бодит гүйцэтгэлийг өсгөхгүй, зөвхөн интерфэйсийн дүрслэлийг богиносгодог.
Wi-Fi болон Bluetooth скан хийх тохиргоог шалгах
Android зарим тохиолдолд Wi-Fi болон Bluetooth-ийг үндсэн түвшинд унтраасан байсан ч ойролцоох сүлжээ, төхөөрөмжийг скан хийж байршил тогтооход ашигладаг.
Энэ боломжийг Location settings хэсгээс унтрааж болдог. Ингэснээр арын горимд хийгдэх зарим үйлдэл багасна.
Гэхдээ Wi-Fi болон Bluetooth scanning-ийг бүрэн идэвхгүй болгосноор байршил тодорхойлох нарийвчлал зарим нөхцөлд муудаж болзошгүйг анхаарах хэрэгтэй.
Хэрэггүй мэдэгдлүүдийг хязгаарлах
Онлайн дэлгүүр, хүргэлтийн үйлчилгээ, төрөл бүрийн платформын аппууд байнга сурталчилгаа, хямдрал, саналын мэдэгдэл илгээдэг.
Android дээр тухайн аппын мэдэгдлийг бүхэлд нь хаахаас гадна зарим тохиолдолд зөвхөн сурталчилгааны төрлийн мэдэгдлийг тусад нь идэвхгүй болгох боломжтой.
Ингэснээр мессеж, захиалга, төлбөртэй холбоотой чухал мэдэгдлүүдийг хэвээр авч, хэрэггүй push notification-оос ангижрах боломжтой.
Мөн зарим үйлдвэрлэгчийн утсанд санал болгож буй апп, зөвлөмж, сурталчилгааны маягийн нэмэлт функц идэвхтэй байдаг. Хэрэглэдэггүй бол эдгээрийг мөн унтрааж болно.
Утас үнэхээр хурдсах уу?
MakeUseOf-ийн туршилтаар дээрх тохиргоог өөрчилсний дараа утасны бодит гүйцэтгэл мэдэгдэхүйц өсөөгүй бөгөөд батарей ч эрс удаан барьдаг болоогүй байна.
Харин хамгийн том өөрчлөлт нь хэрэглэгчийн туршлагад ажиглагджээ. Интерфэйс илүү тайван, цэгцтэй болж, утас хэрэггүй мэдэгдэл болон илүүдэл элементээр хэрэглэгчийн анхаарлыг бага сарниулдаг болсон байна.
Эдгээр тохиргооны нэр, байрлал Samsung, Xiaomi, Google Pixel болон бусад үйлдвэрлэгчийн Android хувилбараас шалтгаалан өөр байж болно.
