Сарын төлбөрөөр Apple төхөөрөмж ашиглах боломжтой болов
Apple АНУ-д Apple Upgrade нэртэй шинэ хөтөлбөр эхлүүлжээ. Энэхүү үйлчилгээ нь хэрэглэгчдэд iPhone, Mac, iPad болон Apple Watch төхөөрөмжийг сарын төлбөртэйгөөр лизингээр ашиглах боломж олгох юм.
Хэрэглэгчид гэрээний хугацаанд төхөөрөмжөө ашиглаад, дараа нь шинэ загвараар солих, буцааж өгөх эсвэл цаашид худалдан авах сонголттой байна. Хөтөлбөрийг санхүүгийн үйлчилгээний Klarna компанитай хамтран хэрэгжүүлж байгаа аж.
Шинэ загварт хурдан шилжихийг хүсдэг хэрэглэгчдэд чиглэжээ
Apple-ийн гүйцэтгэх захирал Тим Кукийн тайлбарласнаар, уг үйлчилгээ нь төхөөрөмжөө ойр ойрхон шинэчилдэг хэрэглэгчдэд илүү тохиромжтой.
Apple өөрийн бүтээгдэхүүний дахин борлуулах үнэ өндөр хэвээр байдагт тулгуурлан ийм загвар эдийн засгийн хувьд ашигтай байж чадна гэж үзэж байна. Үүнтэй төстэй хөтөлбөрийг бусад үйлдвэрлэгчид ч хөгжүүлж байгаа бөгөөд Samsung Galaxy Forever үйлчилгээгээрээ энэ чиглэлд ажиллаж байгаа юм.
Ухаалаг гар утас үнэтэй болж, хэрэглэгчид удаан ашигладаг болжээ
Ийм төрлийн лизингийн үйлчилгээний эрэлт нэмэгдэж буй гол шалтгаан нь смартфоны үнэ өсөж, хэрэглэгчид төхөөрөмжөө өмнөхөөсөө удаан ашигладаг болсонтой холбоотой.
Counterpoint Research-ийн шинжээчдийн тооцоогоор, 2026 онд дэлхий даяар смартфон ашиглах дундаж хугацаа дөрвөн жил хүрч магадгүй байна. Харин АНУ-д премиум ангиллын утас хэрэглэгчид төхөөрөмжөө дунджаар 42 сар орчим ашиглаж байгаа аж.
Хэнэд илүү ашигтай вэ
Мэргэжилтнүүдийн үзэж буйгаар, лизингийн ийм загвар нь нэгээс хоёр жил тутамд утсаа шинэчилдэг хэрэглэгчдэд хамгийн тохиромжтой.
Харин нэг төхөөрөмжөө гурав, таван жил ашигладаг хүмүүст шууд худалдан авах нь ихэнх тохиолдолд илүү хямд тусдаг байна. Тиймээс Apple Upgrade нь бүх хэрэглэгчид бус, шинэ загвар тогтмол авахыг хүсдэг хүмүүст илүү чиглэсэн үйлчилгээ гэж үзэж болно.
Apple сэргээн засварласан төхөөрөмжийн зах зээлээ тэлнэ
Apple-ийн хувьд шинэ хөтөлбөр нь зөвхөн хэрэглэгчдэд төхөөрөмж түрээслүүлэхээс гадна сэргээн засварласан бүтээгдэхүүний зах зээлээ өргөжүүлэх боломж болж байна.
Лизингийн хугацаа дууссан төхөөрөмжүүдийг буцаан авч, сэргээн засварлан дахин борлуулах замаар компани хэрэглэгчидтэйгээ урт хугацааны харилцаа хадгалах, шинэ төхөөрөмж рүү шилжих үйл явцыг илүү хялбар болгох зорилготой байна.
