iPhone 17-ийн бүх загварын үнэ өөрчлөгдөж болзошгүй
Apple iPhone 17 цувралынхаа үнийг бүх борлуулалтын бүсэд нэгэн зэрэг нэмэхээр бэлтгэж байгаа гэх мэдээлэл гарчээ. Энэ талаар Fixed Focus Digital нэрээр танигдсан инсайдер Хятадын Weibo нийгмийн сүлжээнд мэдээлсэн байна.
Түүний бичсэнээр, үнийн өөрчлөлт наймдугаар сарын 10-наас буюу өнөөдрөөс хэрэгжиж эхэлж магадгүй аж. Гэхдээ эх сурвалж тодорхой хувь хэмжээ, эсвэл хэдэн ам.доллараар нэмэгдэх талаар нарийн мэдээлэл өгөөгүй тул өсөлтийн хэмжээ одоогоор тодорхойгүй байна.
Үйлдвэрлэлийн шугамын нэг хэсэг зогссон гэх мэдээлэл байна
Мөн уг инсайдерийн мэдээлснээр, Apple үйлдвэрлэлийн хүчин чадлынхаа зарим хэсгийг түр зогсоосон байж болзошгүй. Түүний хэлснээр, угсралтын шугамын 15-30 хувь нь одоогоор ажиллахгүй байгаа аж.
Ихэвчлэн шинэ үеийн iPhone худалдаанд гарахын өмнө үйлдвэрүүд үйлдвэрлэлийн шугамаа шинэ загварт шилжүүлэхийн тулд ийм төрлийн түр завсарлага хийдэг. Гэхдээ энэ удаа инсайдер уг зогсолтыг үнийн өөрчлөлттэй холбон тайлбарлажээ.
Apple хамгийн удаан үнэ барьсан том үйлдвэрлэгч байсан
Энэ мэдээлэл ухаалаг гар утасны зах зээл дээр санах ойн хомсдол үргэлжилж буй үед гарч байгаа нь анхаарал татаж байна. Томоохон үйлдвэрлэгчдийн ихэнх нь аль хэдийн үнэ нэмэх, эсвэл шинэ загваруудын үзүүлэлтийг бууруулж өртгөө барих арга сонгосон.
Харин Apple одоог хүртэл iPhone-ийн үнийг өргөн хэмжээнд өөрчлөхгүй байсан цөөн том тоглогчдын нэг байлаа.
Саяхны томоохон үнийн өсөлтийн үеэр тус компани Mac, iPad болон Apple Vision бүтээгдэхүүний үнэд өөрчлөлт оруулсан ч iPhone-д хүрээгүй. Зөвхөн Японд iPhone-ийн үнэ 8-11 хувиар өссөн бөгөөд бусад бүс нутагт үнэ хэвээр үлдсэн байна.
iPhone 18 Pro ч илүү үнэтэй гарч магадгүй
Шинжээчдийн таамаг ч iPhone-ийн үнэ ойрын үед буурахгүй байж магадгүйг харуулж байна. J.P. Morgan-ийн үнэлгээгээр дараагийн үеийн iPhone 18 Pro одоогийн загваруудаас 50-100 ам.доллараар өндөр үнэтэй гарах боломжтой аж.
Энэ нь Apple шинэ төхөөрөмжүүддээ илүү үнэтэй бүрэлдэхүүн хэсэг, сайжруулсан технологи ашиглахтай холбоотой байж магадгүй гэж зах зээлийн ажиглагчид үзэж байна.
Одоогоор Apple албан ёсоор батлаагүй
Гэсэн ч энэ мэдээлэл одоогоор зөвхөн нэг инсайдерийн эх сурвалжид тулгуурлаж байгаа бөгөөд Apple албан ёсны мэдэгдэл хийгээгүй байна.
Тиймээс iPhone 17-ийн үнэ өнөөдрөөс өснө гэх мэдээлэлд болгоомжтой хандах шаардлагатай. Гэхдээ хэрэв цуурхал үнэн бол Apple олон бүсэд iPhone-ийн үнийг нэгэн зэрэг шинэчлэх ховор алхам хийх гэж байна гэсэн үг юм.
