Florida Polytechnic University орон нутгийн хууль сахиулах байгууллагад агаарын эргүүл хийх зориулалттай, нисгэгчтэй цахилгаан мультикоптер ашиглахаар бэлтгэж байна.
Тус сургуулийн цагдаагийн алба Jetson ONE загварын аппаратыг ашиглахаар төлөвлөсөн бөгөөд уг төхөөрөмжийг “Astro” хэмээн нэрлэжээ. Үүнийг кампусын нутаг дэвсгэрт эргүүл хийх, онцгой нөхцөл байдалд шуурхай хариу үзүүлэхэд ашиглах юм.
Astro нь цахилгаан хөдөлгүүртэй бөгөөд босоо хөөрөлт, буулт хийх боломжтой. Ингэснээр энгийн эргүүлийн автомашин хүрэхэд хүндрэлтэй газарт цагдаагийн алба хаагчдыг илүү хурдан хүргэх боломжтой гэж үзэж байна.
Гэхдээ төхөөрөмжийг бодитоор ашиглалтад оруулахын өмнө их сургууль АНУ-ын Холбооны нисэхийн удирдлага буюу FAA-аас шаардлагатай зөвшөөрлөө авах ёстой.
Astro нь кампус болон ойр орчмын газар нутгийг агаараас ажиглахад ашиглагдахаас гадна гамшиг, онцгой нөхцөлд аврах ажиллагаанд хэрэглэх боломжтой гэж сургуулийн цагдаагийн газрын дарга Aaron Murray үзэж байна.
Түүний тайлбарласнаар ийм төрлийн нисдэг төхөөрөмжийг байгалийн гамшгийн дараа эм, хүнс болон бусад шаардлагатай хэрэгслийг гамшигт өртсөн бүсэд хүргэхэд ашиглаж болох юм.
Florida Polytechnic University цаашдаа өөрийн кампусаас гадуурх хууль сахиулах байгууллагуудтай хамтран ажиллахаар төлөвлөж байгаа тул Astro-ийн хэрэглээ илүү өргөн хүрээнд тэлэх боломжтой байна.
Aaron Murray хууль сахиулах салбар шинэ технологийн боломжийг илүү идэвхтэй судлах ёстой гэж үзэж байгаа бөгөөд их сургууль эдгээр шийдлийг аюулгүй байдлыг нэмэгдүүлэх нэг хэрэгсэл болгон туршиж байгаа аж.
Jetson ONE-ийг үйлдвэрлэдэг Калифорнийн Jetson компани захиалгын дараалал нь гурван жил орчим болсон ч Florida Polytechnic University-д зориулсан төхөөрөмжийн үйлдвэрлэлийг түргэсгэсэн байна.
Компанийн гүйцэтгэх захирал Stefan D’Haene-ийн хэлснээр Jetson өөрсдийн нисдэг төхөөрөмжийг зөвхөн зугаа цэнгэлийн зориулалтаар хязгаарлахгүй, бодит амьдрал дахь практик хэрэглээг нь өргөжүүлэхийг зорьж байгаа аж.
Jetson ONE нийт найман цахилгаан хөдөлгүүртэй. Дээд хурд нь 101 км/цаг хүрэх бөгөөд нэг цэнэгээр агаарт 20 минут орчим байх боломжтой.
Батарейтайгаа нийлээд аппаратын жин 114.7 кг. Мөн аюулгүй байдлын үүднээс баллистик шүхэр болон автоматаар газардах системээр тоноглогджээ.
Astro нь зөвхөн цагдаагийн хэрэгсэл бус, Florida Polytechnic University-ийн инженерийн судалгааны платформ болох юм.
Тус их сургууль энэ намраас “Aerospace Engineering” буюу сансар, нисэхийн инженерчлэлийн шинэ мэргэжлийн хөтөлбөр нээсэн бөгөөд багш, оюутнууд Astro-оос бодит цагийн нислэгийн мэдээлэл авч судлах боломжтой болно.
Хэрэв FAA-ийн зөвшөөрөл амжилттай гарвал Jetson ONE нь цагдаагийн эргүүл, онцгой нөхцөл байдлын хариу арга хэмжээ, аврах ажиллагаанд ашиглагдах шинэ төрлийн нисдэг тээврийн хэрэгслийн бодит жишээ болж магадгүй байна.
