WWDC 2026 дээр Apple шинэ системээ зарлав
Apple WWDC 2026 хөгжүүлэгчдийн бага хурлын үеэр iOS 27 үйлдлийн системээ албан ёсоор танилцууллаа. Шинэ хувилбар одоогоор хөгжүүлэгчдэд нээлттэй болсон бөгөөд олон нийтэд зориулсан бүрэн хувилбар нь намар гарахаар хүлээгдэж байна.
iOS 27 шинэчлэл iOS 26-г дэмждэг бүх iPhone дээр ажиллах бөгөөд энэ нь iPhone 11 болон түүнээс хойших загварууд шинэ системийг авах боломжтой гэсэн үг юм.
Siri бүрэн шинэчлэгдэж, тусдаа AI апп боллоо
Энэ удаагийн хамгийн том шинэчлэл нь бүрэн өөрчлөгдсөн Siri юм. Apple-ийн дуут туслах одоо тусдаа хиймэл оюун ухаант аппликэйшн хэлбэрээр ажиллаж, хэрэглэгчтэй илүү бүрэн хэмжээний харилцан яриа хийх боломжтой болжээ.
Шинэ Siri нь ярианы агуулгыг санаж, өмнөх асуулт, хэрэглэгчийн нөхцөл байдлыг ойлгон илүү төвөгтэй даалгавар гүйцэтгэх чадвартай болсон байна. Туслах нь захидал, мессеж, календарийн үйл явдал зэрэг мэдээллийг шинжилж, шаардлагатай үед тэмдэглэл автоматаар үүсгэх, мессеж илгээх зэрэг үйлдлийг хийх боломжтой аж.
Apple Intelligence бусад аппуудад илүү өргөн нэвтэрнэ
Apple зөвхөн Siri-г шинэчлээд зогсохгүй хиймэл оюун ухааны боломжуудыг бусад үндсэн аппликэйшндээ өргөжүүлжээ. Safari шинэ системд илүү ухаалаг болж, табуудыг автоматаар цэгцлэх, вэбсайтууд дээрх өөрчлөлтийг хянах хэрэгслүүдтэй болсон байна.
“Photos” апп ч мөн AI-д суурилсан шинэ засварлах боломжуудтай болжээ. Хэрэглэгчид зургаа кадрын гадна тал руу өргөтгөх, гэрэл зургийн өнцөг, перспективийг өөрчлөх зэрэг илүү нарийн засварыг шууд төхөөрөмж дээрээ хийх боломжтой болно.
Хүүхдийн цахим аюулгүй байдалд илүү их анхаарчээ
iOS 27-д хүүхдийн интернэт хэрэглээний аюулгүй байдлыг сайжруулахад чиглэсэн шинэ боломжууд нэмэгдсэн байна. Apple энэ удаа эцэг эхийн хяналтын хэрэгслүүдийг илүү нарийвчилж, хүүхдийн онлайн орчныг илүү сайн удирдах боломж олгожээ.
Шинэ функцуудын тусламжтайгаар эцэг эхчүүд хүүхдийн худалдан авалтыг зөвшөөрөх, мэдрэмтгий агуулгатай контент үзэхийг хянах, аппликэйшн болон сошиал сүлжээний хэрэглээг илүү дэлгэрэнгүй ажиглах боломжтой болно.
Энэ нь хүүхэд төхөөрөмж ашиглах үед илүү хамгаалалттай, хяналттай орчин бүрдүүлэх зорилготой шинэчлэл гэж үзэж байна.
Видео дээрх subtitle-ийг төхөөрөмж дээр автоматаар үүсгэнэ
iOS 27-ийн бас нэг чухал шинэ боломж нь видео бичлэгт зориулсан автомат subtitle үүсгэх функц юм. Энэ боломж нь видео дээрх яриаг төхөөрөмж дээр шууд таньж, хадмал хэлбэрээр гаргах зориулалттай.
Функц нь галерей доторх видео, мессежээр ирсэн бичлэг болон онлайн видео үзэх үед ажиллах боломжтой гэж танилцуулагдсан байна. Эхний шатанд энэ шинэчлэл зөвхөн АНУ, Канад дахь англи хэлтэй контентод ашиглах боломжтой байх аж.
iPhone хэрэглэгчдэд зориулсан илүү ухаалаг шинэ үе эхэлж байна
iOS 27 нь Apple-ийн хувьд хиймэл оюун ухааныг iPhone-ийн өдөр тутмын хэрэглээнд илүү гүн нэвтрүүлэх том алхам болж байна. Siri-ийн шинэчлэл, Safari болон Photos дахь AI хэрэгслүүд, хүүхдийн аюулгүй байдлын нэмэлт тохиргоо, автомат subtitle зэрэг функцууд нь системийг илүү ухаалаг, хэрэглэхэд хялбар болгох зорилготой юм.
Шинэ хувилбар намар бүх хэрэглэгчдэд хүрэх үед iPhone 11 болон түүнээс шинэ загварууд iOS 27-ийн гол боломжуудыг авах боломжтой болно.
