iPhone 18 Pro-г iPhone 15 Pro, iPhone 16 Pro болон iPhone 17 Pro-той харьцуулсан туршилтаас харахад хоёр, гурван жилийн өмнөх загвараас шинэчлэх үед өөрчлөлт хамгийн их мэдрэгдэхээр байна. Харин iPhone 17 Pro-оос шилжихэд ялгаа харьцангуй бага аж.
Сүүлийн гурван үеийн хугацаанд Apple Pro загварын дэлгэц, камер, хүчин чадал, батарейн ажиллах хугацаа болон их биеийн хийцэд хэд хэдэн томоохон өөрчлөлт оруулжээ.
Дэлгэц томорч, гэрэлтэлт 3000 нитэд хүрчээ
iPhone 15 Pro 6.1 инчийн дэлгэцтэй байсан бол iPhone 18 Pro-ийн дэлгэц 6.3 инч болсон байна.
Шинэ загварын хамгийн их гэрэлтэлт 3000 нитэд хүрсэн бол 120 Гц-ийн шинэчлэлтийн давтамж болон Always-On Display боломж хэвээр хадгалагджээ.
Dynamic Island хэсэг өмнөхөөсөө авсаархан болсон бөгөөд их биеийн материал ч өөрчлөгдсөн байна. iPhone 15 Pro болон iPhone 16 Pro-д титан ашиглаж байсан бол iPhone 18 Pro хөнгөн цагаан хийцтэй болжээ.
Камерт хамгийн том шинэчлэл оржээ
iPhone 18 Pro-ийн гол өөрчлөлтүүдийн нэг нь камерын систем байна.
Үндсэн 48 мегапикселийн камер f/1.48, f/1.8, f/2.8 болон f/4.0 гэсэн дөрвөн байрлалтай өөрчлөгддөг өрцтэй болжээ.
Энэ нь мэдрэгчид орох гэрлийн хэмжээг тохируулахын зэрэгцээ зураг дахь фокусын гүнийг илүү нарийн удирдах боломж олгоно.
Телефото камер мөн 48 мегапикселийн нягтаршилтай бөгөөд 4 дахин оптик томруулалт, 8 дахин “оптик чанартай” ойртуулалт дэмждэг байна.
Урд талын Center Stage камер 18 мегапикселийн шинэ мэдрэгчтэй болжээ.
A20 Pro чип, 12 ГБ шуурхай санах ойтой
iPhone 18 Pro-д 2 нанометрийн технологиор үйлдвэрлэсэн A20 Pro чип, 7 цөмт график боловсруулагч болон 12 ГБ шуурхай санах ой суурилуулсан байна.
ZONEofTECH-ийн туршилтаар шинэ загвар зарим төв процессорын даалгаварт iPhone 16 Pro Max-аас ойролцоогоор 34-45 хувь хурдан ажиллажээ.
Графикийн зарим туршилтад гүйцэтгэлийн өсөлт хоёр дахинаас ч давсан бол iPhone 15 Pro-той харьцуулахад ялгаа бүр ч их байсан байна.
Батарейн ажиллах хугацаа мэдэгдэхүйц нэмэгдэв
iPhone 18 Pro нэг цэнэгээр 36 цаг хүртэл видео тоглуулах боломжтой гэж мэдээлжээ. Харин iPhone 18 Pro Max-ийн хувьд энэ үзүүлэлт 45 цаг хүртэл байна.
Хурдан утастай цэнэглэлтийг ч сайжруулсан бөгөөд 60 Вт болон түүнээс дээш хүчин чадалтай тохирох адаптер ашиглавал батарейг ойролцоогоор 15 минутын дотор 50 хувь хүртэл цэнэглэх боломжтой аж.
iPhone 15 Pro, 16 Pro-оос шилжихэд ялгаа хамгийн их
Харьцуулалтаас үзэхэд iPhone 15 Pro болон iPhone 16 Pro хэрэглэгчид шинэ загварт шилжвэл камер, хүчин чадал, батарейн ажиллах хугацаа болон хийцийн өөрчлөлтийг хамгийн тод мэдрэх боломжтой.
Харин iPhone 17 Pro болон iPhone 18 Pro-ийн хоорондын ялгаа бага бөгөөд гол шинэчлэл нь өөрчлөгддөг өрцтэй камер, A20 Pro чип болон илүү удаан ажиллах батарей болж байна.
АНУ-д iPhone 18 Pro-ийн 256 ГБ багтаамжтай хувилбарын үнэ 1,199 ам.доллароос эхэлж байгаа аж.
Ийнхүү iPhone 18 Pro нь өмнөх жилийн загвараас бүрэн шинэ түвшний өөрчлөлт авчраагүй ч iPhone 15 Pro болон iPhone 16 Pro үеийн хэрэглэгчдийн хувьд хэд хэдэн гол үзүүлэлтээр мэдэгдэхүйц том шинэчлэл болжээ.
