“Ingenuity”-ийн амжилтыг дараагийн шатанд ашиглана
NASA ирээдүйд Ангараг гараг дээр сансрын нисэгчид буух боломжтой бүсүүдийг робот нисдэг тэргүүдээр судлахаар төлөвлөж байна. Тус агентлаг өмнө нь Ангараг дээр амжилттай нислэг үйлдсэн “Ingenuity” загварын туршлагад тулгуурлан шинэ даалгавар хэрэгжүүлэхээр бэлтгэж байгаа аж.
Энэ төрлийн робот төхөөрөмжүүд нь явагч аппарат хүрч чаддаггүй бартаатай, алслагдсан бүсүүдийг агаараас ажиглаж, буух талбай сонгоход хэрэгтэй мэдээлэл цуглуулах боломжтой юм.
“SkyFall” ачааг 2026 онд хөөргөх төлөвлөгөөтэй
NASA-гийн мэдээллээр, цөмийн түлшээр ажиллах хөдөлгүүртэй гараг хоорондын анхны аппаратыг 2026 онд хөөргөхөөр төлөвлөж байна. Энэхүү төхөөрөмж Ангараг руу “SkyFall” нэртэй ачааг хүргэх бөгөөд түүнд “Ingenuity” ангиллын робот нисдэг тэргүүд багтах аж.
Тэдгээр нисдэг роботууд Ангарагийн гадаргууг судалж, ирээдүйн хүнтэй нислэгийн үед сансрын нисэгчид буухад аюулгүй, тохиромжтой газруудыг тодорхойлоход ашиглагдана.
NASA өмнө нь Ангараг руу хүнтэй нислэгийг 2040 оноос өмнө хийх боломжтой гэж мэдэгдэж байсан юм.
“SR-1 Freedom” аппаратын өртөг 2.1 тэрбум ам.доллар байж магадгүй
Мөн NASA “SR-1 буюу Space Reactor-1 Freedom” нэртэй цөмийн хөдөлгүүртэй сансрын аппаратыг хамгийн бага нэмэлт зардлаар бүтээхээр төлөвлөж байна.
Уг аппаратыг түр зогсоосон “Gateway” хөтөлбөрийн хүрээнд өмнө нь худалдан авсан тоног төхөөрөмжийг ашиглан угсрах аж. “Gateway” нь Сарны орчмын тойрог замд сансрын станц байгуулах зорилготой байсан хөтөлбөр юм.
Тооцоогоор “SR-1 Freedom”-ийг бүтээж, Ангараг руу илгээхэд NASA ойролцоогоор 2.1 тэрбум ам.доллар зарцуулахаар байна.
Жижиг нисдэг тэрэг Ангараг дээр 72 удаа ниссэн
“Ingenuity” робот нисдэг тэрэг 2021-2024 онд Ангараг гарагийг судлах ажилд ашиглагдсан. Түүнийг “Perseverance” явагч аппаратын хамт 2021 онд Улаан нүдэн гараг руу илгээсэн билээ.
Ердөө 1.8 кг орчим жинтэй энэ төхөөрөмжийг бүтээхэд 80 сая ам.доллар зарцуулсан гэж NASA мэдээлж байсан. Гэсэн ч “Ingenuity” Ангараг дээр нийт 72 нислэг хийж, өөр гаргийн агаарт робот нислэг хийх боломжийг бодитоор нотолсон юм.
“Perseverance” хүрч чадахгүй газруудыг агаараас судалж байжээ
“Ingenuity”-ийн үндсэн үүрэг нь “Perseverance” явагчийн хүрч чадахгүй бүсүүдийг судлах, Ангарагийн гадаргуугийн 3D зураглал гаргах, судалгааны чиглэлд нэмэлт мэдээлэл цуглуулах байсан.
Агаараас ажиглах боломж нь бартаатай орчинд явагч аппаратаас давуу талтай. Тиймээс NASA энэ туршлагыг ирээдүйн хүнтэй нислэгийн бэлтгэлд ашиглах сонирхолтой байгаа аж.
Сэнс нь гэмтсэний дараа даалгавар дууссан
“Ingenuity” сүүлчийн нислэгийнхээ дараа газардах үедээ сэнсний гэмтэл авсан тул NASA 2024 оны нэгдүгээр сард түүний даалгаврыг албан ёсоор дуусгасан гэж мэдэгдсэн.
Гэсэн хэдий ч төхөөрөмжийн олон удаагийн амжилттай нислэг Ангараг дээр нисдэг робот ашиглах шинэ боломжийг нээсэн. Одоо энэ технологи хүн буух газар хайх дараагийн том зорилгод ашиглагдаж магадгүй байна.
Ангарагийн хүнтэй нислэгийн бэлтгэл хурдасна
Хэрэв төлөвлөгөө хэрэгжвэл “SkyFall” ачаагаар хүргэгдэх шинэ робот нисдэг тэргүүд Ангараг дээрх ирээдүйн бааз, буух талбай, судалгааны маршрутыг сонгоход чухал үүрэг гүйцэтгэнэ.
NASA-ийн хувьд энэ нь Улаан нүдэн гараг руу хүн илгээх урт хугацааны төлөвлөгөөг илүү бодитой болгох нэг алхам юм. “Ingenuity”-ийн амжилт жижиг робот нисдэг тэрэг Ангарагийн судалгаанд ямар их үнэ цэнтэй байж болохыг харуулсан бол дараагийн үе нь хүнтэй нислэгийн замыг бэлтгэх зорилготой байна.
