Samsung One UI 9 шинэчлэлээ илүү олон Galaxy төхөөрөмжид албан ёсоор хүргэж эхэлжээ. Есдүгээр сарын 16-наас Galaxy S26, Galaxy S26+ болон Galaxy S26 Ultra загварууд шинэ интерфейсийг хүлээн авч эхэлсэн байна.
Үүнээс өмнө One UI 9 нь Galaxy Fold8 Ultra, Fold8 болон Flip8 дээр анх нэвтэрсэн бөгөөд одоо компанийн тэргүүлэх уламжлалт ухаалаг гар утаснууд руу өргөжиж байна.
Galaxy AI илүү идэвхтэй ажиллана
One UI 9-ийн гол шинэчлэлүүдийн нэг нь Galaxy AI-ийн боломжуудыг өргөжүүлсэн явдал юм.
Шинэ My FanCam функц нь аль хэдийн бичигдсэн видеон дотроос сонгосон хүнийг автоматаар дагаж, кадрын төвд тогтвортой байлгах боломжтой.
Now Brief хэсэгт мөн генератив картууд нэмэгдсэн бөгөөд хэрэглэгч өдөр тутмын товч мэдээллээ өөрийн хэрэгцээнд нийцүүлэн тохируулах боломжтой болжээ. Жишээлбэл, цаг агаар, эрүүл мэнд, видео контент зэрэг мэдээллийг нэг дороос харах боломжтой.
Now Nudge тухайн нөхцөлд тохирсон зөвлөмж өгнө
One UI 9-д шинээр нэмэгдсэн Now Nudge функц нь хэрэглэгч тухайн үед утсаараа юу хийж байгаагаас шалтгаалан хэрэгтэй зөвлөмж гаргаж ирнэ.
Жишээлбэл, мессенжерт аяллын талаар ярилцаж байвал систем захиалгын мэдээллээ шалгах, эсвэл чат доторх хаягийг шууд хадгалах санал өгөх боломжтой.
Creative Studio нь харин ойртож буй үйл явдал, баяр ёслолд тулгуурлан зураг, мэндчилгээ бүтээх санаа санал болгох зориулалттай.
Орчуулгын ажиллагаа илүү хурдан болжээ
Samsung орчуулгын функцийг ч шинэчилсэн байна.
“Interpreter” хэсэгт ярианы түүхийг харах боломж нэмэгдсэн бөгөөд харилцан ярианы үеийн орчуулгын хоцролтыг багасгасан гэж компани мэдээлжээ.
Мөн нийцтэй Galaxy Buds чихэвч ашиглах үед орчуулсан яриаг өмнөхөөс илүү хурдан сонсох боломжтой болох аж.
Баримт скан хийх болон дуу бичлэг боловсруулах чадвар сайжрав
One UI 9 баримт бичиг скан хийх үеийн боловсруулалтыг мөн сайжруулжээ.
Систем муруйсан номын хуудас, нугалсан цаас зэрэг төвөгтэй материалын хэлбэрийг илүү сайн таньж, боловсруулах боломжтой болсон байна.
Дуу бичлэгийн функц ч шинэчлэгдэж, урт бичлэгүүдээс гаргах хураангуйг илүү бүтэцтэй болгожээ. Одоо гарчиг, хүснэгт ашиглан гол мэдээллийг ялгаж өгөх боломжтой болсон нь хэрэгтэй хэсгийг хурдан олоход дөхөм болно.
Security Brief аюулгүй байдлын эрсдэлийг харуулна
Samsung One UI 9-д аюулгүй байдлын чиглэлээр ч хэд хэдэн шинэ функц нэмсэн байна.
Security Brief нь Now Brief хэсэгт хортой програм, үл мэдэгдэх эх сурвалжаас суулгасан апп, хэт өргөн зөвшөөрөл хүсэж буй програм зэрэг эрсдэлийн талаар анхааруулга харуулна.
Мөн төхөөрөмж дээр ажиллах хиймэл оюуны алгоритмуудыг ашиглан сэжигтэй өгөгдөлд хандах хүсэлтийг илрүүлэх боломжтой болжээ.
Samsung залилангийн дуудлага таних функцийг цаашид Япон, Канад болон Энэтхэг зэрэг оронд өргөжүүлэхээр төлөвлөж байна.
Бүх функц бүх төхөөрөмжид адилхан ирэхгүй
Samsung-ийн тайлбарласнаар One UI 9-ийн зарим боломж төхөөрөмжийн загвар, улс, хэл болон бүс нутгаас шалтгаалан ялгаатай байж болно.
Тиймээс Galaxy S26 цуврал хэрэглэгчид шинэчлэлээ авч эхэлсэн ч бүх функц ижил хугацаанд идэвхжихгүй байх магадлалтай.
Компанийн төлөвлөгөөгөөр One UI 9 цаашид бусад нийцтэй Galaxy төхөөрөмжүүдэд үе шаттайгаар түгээгдэх юм.
