Sony шинэ PlayStation тоглоомуудаа зөвхөн дижитал хэлбэрээр гаргахаар бэлтгэж байна
Sony Interactive Entertainment PlayStation тоглоомын борлуулалтын хэлбэрт томоохон өөрчлөлт хийхээр төлөвлөж байна. Компанийн мэдэгдсэнээр 2028 оны 1 дүгээр сараас эхлэн PlayStation консолд зориулсан шинэ тоглоомуудын физик хувилбар буюу дискэн хувилбарыг гаргахаа зогсоох ажээ.
Үүнээс хойш бүх шинэ релиз зөвхөн дижитал хэлбэрээр худалдаанд гарах бөгөөд хэрэглэгчид тоглоомуудыг PlayStation Store-оос шууд авах эсвэл дижитал түлхүүр худалдаалах ритейлерүүдээр дамжуулан худалдан авах боломжтой болно.
Тоглогчдын хэрэглээ өөрчлөгдсөн гэж Sony тайлбарлав
Sony энэ шийдвэрээ тоглогчдын дадал, хэрэглээний өөрчлөлттэй холбон тайлбарлаж байна. Компанийн мэдээлснээр сүүлийн жилүүдэд улам олон хэрэглэгч тоглоомын дижитал хувилбарыг сонгох болсон бол дискэн хувилбарын эрэлт аажмаар буурчээ.
Физик носитель буюу дискнээс татгалзсанаар Sony илүү орчин үеийн худалдан авалт, контентод хандах хэлбэрүүдэд төвлөрөх боломжтой гэж үзэж байна.
Өмнө гарсан тоглоомууд дискэн хэлбэрээр үлдэнэ
Энэхүү өөрчлөлт зөвхөн ирээдүйд гарах шинэ релизүүдэд хамаарах юм. Харин 2028 оны 1 дүгээр сараас өмнө дискэн хувилбараар гарсан эсвэл тухайн хугацаанаас өмнө дискээр гарахаар төлөвлөгдсөн тоглоомууд физик хэлбэрээрээ худалдаанд үлдэх ажээ.
Ингэснээр PlayStation-ийн одоогийн хэрэглэгчид өмнөх тоглоомуудаа дискээр худалдан авах боломжоо шууд алдахгүй боловч шинэ бүтээлүүдийн хувьд дижитал хэлбэр үндсэн, цорын ганц сонголт болох юм.
Sony энэ шийдвэрийг “байгалийн алхам” гэж нэрлэв
Sony Interactive Entertainment-ийн контентын харилцаа холбоо хариуцсан ахлах захирал Сид Шуман энэхүү шийдвэрийг хэрэглэгчдийн чиг хандлагад дасан зохицож буй компанийн хувьд зүй ёсны алхам гэж тодорхойлжээ.
Түүний хэлснээр дижитал борлуулалт аль хэдийн физик хуулбарын сонирхлоос мэдэгдэхүйц давсан байна. Ийм нөхцөлд PlayStation-ийн ирээдүйн стратеги улам бүр дижитал үйлчилгээ, онлайн худалдан авалт, хэрэглэгчийн бүртгэлтэй холбогдсон экосистем рүү шилжихээр харагдаж байна.
PS3 болон PS Vita-д зориулсан PlayStation Store хаагдана
Үүний зэрэгцээ Sony хуучин үеийн консолууд болох PS3 болон PS Vita-д зориулсан PlayStation Store-ийг үе шаттайгаар хаахаар болсноо мэдээлжээ.
Латин Америкийн зарим оронд PS3-д зориулсан дэлгүүр 2026 оны хоёрдугаар хагаст ажиллахаа болино. Харин бусад бүс нутагт PS3 болон PS Vita-д зориулсан PS Store 2027 оны 7 дугаар сард хаагдах ажээ.
Шинэ тоглоом, нэмэлт контент худалдан авах боломжгүй болно
Дэлгүүрүүд хаагдсаны дараа хэрэглэгчид эдгээр платформ дээр шинэ тоглоом болон нэмэлт контент худалдан авах боломжгүй болно. Гэсэн хэдий ч өмнө нь худалдаж авсан контент тодорхойгүй хугацаанд дахин татаж авах боломжтой хэвээр үлдэнэ гэж Sony мэдэгдсэн байна.
Энэ нь PS3 болон PS Vita хэрэглэгчдийн хувьд өмнөх худалдан авалтаа бүрэн алдахгүй гэсэн үг боловч шинэ контент авах боломж аажмаар хаагдах юм.
Хуучин консолууд орчин үеийн системийг дэмжихэд хүндрэлтэй болжээ
Sony хуучин дэлгүүрүүдийг хаах шалтгаанаа техник, дэд бүтцийн асуудалтай холбон тайлбарласан байна. Компанийн мэдээлснээр PS3 болон PS Vita зэрэг хуучирсан консолууд орчин үеийн төлбөрийн систем болон PlayStation Store-ийн шинэ дэд бүтцийг бүрэн дэмжих боломжгүй болсон ажээ.
Тус компани PS3 болон PS Vita эзэмшигчдэд олон жилийн турш үзүүлсэн дэмжлэгт нь талархал илэрхийлээд, цаашид PlayStation-ийн одоогийн болон ирээдүйн платформуудыг хөгжүүлэхэд анхаарлаа төвлөрүүлэхээ мэдэгдсэн байна.
