Европын Холбоо хиймэл оюунаар бүтээсэн контентыг заавал тэмдэглэх шинэ шаардлагыг хэрэгжүүлж эхэллээ. Наймдугаар сарын 2-ноос хүчин төгөлдөр болсон уг журам нь AI системээр үүсгэсэн зураг, видео, аудио болон бичвэрт хамаарч байгаа талаар PhoneArena мэдээлэв.
Гэвч шинэ хуульд анхаарал татахуйц нэгэн үл хамаарах нөхцөл багтжээ. Тодруулбал, зөвхөн бодит мэт харагдахаар бүтээгдсэн AI контентыг тэмдэглэх шаардлагатай. Харин ямар материалыг “бодит мэт” гэж үзэхийг хуульд тодорхой заагаагүй нь шинэ зохицуулалтын хамгийн сул тал болж байна.
Хувийн хэрэглээнд зориулсан контент, мөн илт уран сайхны, хошин шогийн болон зохиомол бүтээлүүдийг уг шаардлагаас чөлөөлжээ. Компаниуд Европын Комиссоос санал болгосон хар, цагаан тэмдэглэгээг ашиглаж болохоос гадна хиймэл оюун хэрэглэснийг ойлгомжтой харуулсан өөрсдийн тэмдэглэгээг нэвтрүүлэх боломжтой.
Шинэ дүрмийг зөрчсөн компаниудад 15 сая евро хүртэлх торгууль ногдуулах эсвэл дэлхий даяарх жилийн нийт орлогынх нь 3 хувийг төлүүлэхээр заасан байна. Өмнө нь ашиглалтад орсон AI системүүдэд дөрвөн сарын шилжилтийн хугацаа олгосон бол шинээр нэвтэрч буй үйлчилгээ дүрмийг нэн даруй мөрдөх ёстой.
Технологийн томоохон компаниудын зарим нь AI контентод тэмдэглэгээ хийх аргыг аль хэдийн ашиглаж эхэлсэн. Жишээлбэл, Google SynthID технологийг хэрэглэдэг бол TikTok хиймэл оюунаар бүтээсэн материалыг тусгайлан тэмдэглэдэг. Харин ЕХ-ны шинэ журам нь ийм хяналтыг холбооны зах зээлд ажилладаг бүх компанид заавал мөрдүүлэх зорилготой.
