Зуны халуунд ухаалаг гар утас хэт халах тохиолдол цөөнгүй гардаг. Ийм үед төхөөрөмжийг зөв хөргөхгүй бол зай, дэлгэц, дотоод эд анги гэмтэх эрсдэлтэй гэж мэргэжилтнүүд анхааруулжээ.
Хэт халсан утсыг шууд сэрүүн газар тавих хэрэгтэй
Хэрэв ухаалаг гар утас хэт халсан бол хамгийн түрүүнд түүнийг ашиглахаа зогсоож, сэрүүн орчинд шилжүүлэх шаардлагатай. Төхөөрөмжийг нарны шууд тусгалаас холдуулж, цэнэглэж байгаа бол цэнэглэгчээс салгах нь зүйтэй.
Мөн тухайн үед ажиллаж буй их нөөц шаарддаг аппликейшнүүдийг хаах хэрэгтэй гэж мэргэжилтнүүд зөвлөсөн байна.
“Мэдээж, түүнийг нарны шууд тусгалаас холдуулж, цэнэглэж байгаа бол цахилгаанаас салгаж, ажиллаж буй их ачаалалтай бүх програмыг хаах хэрэгтэй” гэж нийтлэлд дурджээ.
Сүүдэр, агааржуулалт хамгийн зөв сонголт
Утсаа хөргөхийн тулд сүүдэртэй, агаар сайн сэлгэдэг газарт байрлуулах нь хамгийн аюулгүй арга гэж зөвлөжээ. Мөн сэнсний ойролцоо тавьж, төхөөрөмжийн дулааныг аажмаар бууруулах боломжтой.
Автомашинд явж байх үед агааржуулагчийн сэрүүн агаарыг утас руу чиглүүлэх нь тус болох ч хэт огцом хөргөхөөс зайлсхийх хэрэгтэй.
Ус, мөсөөр хөргөж огт болохгүй
Мэргэжилтнүүдийн онцолсноор ухаалаг гар утсыг ус, мөсөөр хөргөх нь хамгийн буруу арга юм. Огцом хүйтэн, чийг нь төхөөрөмжийн дотоод эд ангид гэмтэл учруулж, бүрэн ажиллагаагүй болгох эрсдэлтэй.
Иймээс утсыг хөргөхдөө зөвхөн хуурай, сэрүүн, агааржуулалттай орчин сонгох хэрэгтэй.
“Утас хүрэхэд сэрүүн болсон даруйд та түүнийг ердийнхөөрөө дахин ашиглаж болно” гэж мэргэжилтнүүд онцолсон байна.
Утсаа хэт халахаас хэрхэн сэргийлэх вэ?
Ухаалаг гар утсаа халуунд гэмтээхгүй байхын тулд нарны шууд тусгалд удаан орхихгүй байх шаардлагатай. Мөн хэт зузаан, агаар нэвтрүүлдэггүй гэр хэрэглэвэл төхөөрөмжийн дулаан гадагшлахад саад болдог.
Халуун үед утсаа цэнэглэх, өндөр ачаалалтай тоглоом тоглох, зураг, бичлэг боловсруулах зэрэг их нөөц шаарддаг үйлдэл хийхээс зайлсхийх нь зүйтэй.
Ингэснээр ухаалаг гар утасны зай, дэлгэц, дотоод эд ангиудыг хамгаалж, төхөөрөмжийн ажиллагааг хэвийн хадгалах боломжтой.
