Утас сонгохдоо зөвхөн камер, үзүүлэлт харах хангалтгүй
Шинэ смартфон сонгох үед хэрэглэгчид ихэвчлэн процессор, камер, дэлгэц, батарей зэрэг техникийн үзүүлэлтэд анхаардаг. Гэвч төхөөрөмж хэдэн жил найдвартай ажиллах вэ гэдэг асуулт улам чухал болж байна.
BGR-ийн сэтгүүлчид iPhone үнэхээр Samsung-ийн flagship загваруудаас илүү удаан “шинэ” хэвээр үлддэг эсэх, эсвэл хоёр брэндийн ялгаа сүүлийн жилүүдэд багассан эсэхийг харьцуулан авч үзжээ.
Apple удаан хугацааны шинэчлэлтээрээ давуу байсан
Хэдхэн жилийн өмнө смартфоны урт настай хэрэглээний хувьд Apple илт давуу байр суурьтай байв.
iPhone загварууд олон жилийн турш iOS шинэчлэлт авдаг бөгөөд Apple ихэвчлэн 5–7 жилийн турш үндсэн шинэчлэлт, зарим тохиолдолд түүнээс ч удаан хугацаанд security patch өгдөг.
Иймээс хуучин iPhone-ууд шинэ аппликейшнтэй нийцтэй хэвээр үлдэж, аюулгүй байдлын хувьд ч илүү удаан ашиглагдах боломжтой байдаг.
Samsung ялгааг мэдэгдэхүйц багасгалаа
Гэхдээ Samsung сүүлийн жилүүдэд энэ тал дээр том алхам хийсэн.
Galaxy S цувралын шинэ flagship загварууд Android шинэчлэлт болон security patch-ийг долоон жил хүртэл авах болсон нь программын дэмжлэгийн хугацаагаар iPhone-той бараг ижил түвшинд хүргэж байна.
Өөрөөр хэлбэл, шинэ Samsung flagship хэрэглэгчид ч өнөөдөр төхөөрөмжөө 5–7 жил ашиглах бодит боломжтой болжээ.
Шинэчлэлтийн хурд Apple-д давуу тал өгдөг
Гэсэн ч зөвхөн хэдэн жил шинэчлэлт авах нь бүх зүйлийг шийдэхгүй.
Apple iOS-оо өөрөө бүрэн хянадаг тул шинэ хувилбарыг дэмжигдэх бүх iPhone дээр нэгэн зэрэг гаргах боломжтой. Харин Android ecosystem-д эхлээд Google шинэ Android-оо гаргаж, дараа нь Samsung түүнийг One UI интерфейстэйгээ тохируулан өөрчлөх шаардлагатай болдог.
Үүний улмаас Samsung-ийн шинэчлэлт заримдаа хэдэн сар хүлээгдэж байж хэрэглэгчдэд хүрдэг. Энэ нь программын дэмжлэгийн хугацаа ижил болсон ч шинэчлэлт авах хурд Apple-ийн талд давуу хэвээр байгааг харуулж байна.
Хуучин iPhone-уудын гүйцэтгэл сайн хадгалагддаг
Удаан ашиглахад гүйцэтгэл ч чухал хүчин зүйл юм.
Жишээлбэл, iPhone 11 цуврал энэ жил долоон настай болох ч iOS 27 шинэчлэлтийг авах төлөвтэй байна. Үүнээс гадна эдгээр төхөөрөмжийн гүйцэтгэл олон шинэ дундаж ангиллын Android смартфонтой өрсөлдөх хэмжээнд хэвээр байгааг мэргэжилтнүүд онцолжээ.
Энэ нь Apple-ийн чипүүд урт хугацаанд сайн ажилладаг, мөн iOS-ийн оновчлол хуучин төхөөрөмж дээр ч харьцангуй тогтвортой байдагтай холбоотой гэж тайлбарлаж байна.
iPhone дахин худалдах үнэ цэнээ илүү сайн хадгалдаг
Смартфон олон жил ашиглагдах эсэхийг хэмжих өөр нэг үзүүлэлт бол resale value буюу дахин худалдах үнэ юм.
SellCell-ийн 2025 оны наймдугаар сард нийтэлсэн судалгаагаар, зах зээлд гарснаас хойш таван сарын дараа iPhone 16 анхны үнээсээ 35.4 хувиар буурсан байна.
Харин Samsung Galaxy S25 ижил хугацаанд 46.6 хувийн үнэ цэнээ алдсан гэж судалгаанд дурджээ.
Энэ нь iPhone хуучин зах зээл дээр илүү тогтвортой үнэ хадгалдаг бөгөөд төхөөрөмжөө дараа нь зарах эсвэл шинэ загварт шилжих үед хэрэглэгчид илүү бага алдагдал хүлээдэг гэсэн үг юм.
iPhone 17-ийн борлуулалт Apple-ийн эрэлтийг дахин баталсан
Apple-ийн төхөөрөмжүүдийн эрэлт өндөр хэвээр байгааг iPhone 17 цувралын борлуулалт мөн харуулсан байна.
2025 оны есдүгээр сард худалдаанд гарсны дараа iPhone 17 цуврал рекорд борлуулалттай байсан бөгөөд үндсэн загвар нь хэдэн сарын турш хомсдолтой хэвээр байсан гэж мэдээлжээ.
Энэ нь хэрэглэгчид шинэ iPhone-д өндөр үнэ төлөхөд бэлэн хэвээр байгааг харуулж байна.
Засвар үйлчилгээ, батарей солих боломж ч чухал
Смартфоны урт хугацааны хэрэглээ зөвхөн software update болон корпусын бат бөх чанараас хамаардаггүй.
Батарей ямар ч төхөөрөмж дээр цаг хугацааны явцад багтаамжаа алддаг. Тиймээс хэдэн жил идэвхтэй хэрэглэсний дараа хэрэглэгчид аккумулятор солих шаардлагатай болдог.
Энэ үед албан ёсны сервис, засварын хүртээмж, баталгаат үйлчилгээний нөхцөл маш чухал болно.
Apple-ийн сервисийн сүлжээ илүү давуу гэж үнэлэгджээ
Apple болон Samsung аль аль нь төхөөрөмждөө өргөтгөсөн баталгааны хөтөлбөр санал болгодог. Гэсэн ч шинжээчид Apple-ийг сервисийн сүлжээний хувьд давуу гэж үзжээ.
Олон улсад Apple Store болон албан ёсны үйлчилгээний төвүүд өргөн тархсан тул iPhone хэрэглэгчид оношилгоо, засварт хурдан цаг авах боломжтой байдаг. Зарим тохиолдолд хэрэглэгчид маргааш нь хүртэл үйлчилгээ авах боломжтой.
Samsung-ийн хувьд сервисийн боломж тухайн бүс нутгаас ихээхэн хамаардаг. Зарим оронд хэрэглэгчид төхөөрөмжөө authorized service center рүү илгээх шаардлагатай болдог бөгөөд энэ нь засварын хугацааг уртасгаж магадгүй юм.
Орчин үеийн iPhone, Samsung аль аль нь 5–7 жил ашиглагдах боломжтой
Дүгнэж хэлбэл, өнөөгийн Samsung flagship болон iPhone загварууд аль аль нь 5–7 жил, зарим тохиолдолд түүнээс ч удаан хугацаанд асуудалгүй ашиглагдах боломжтой болсон.
Samsung программын дэмжлэгийн хугацаагаар Apple-ийг бараг гүйцсэн нь Android хэрэглэгчдийн хувьд том давуу тал юм.
Гэсэн ч Apple синхрон iOS шинэчлэлт, олон жилийн дараах тогтвортой гүйцэтгэл, resale value-ийн өндөр түвшин, илүү хөгжсөн сервисийн сүлжээгээрээ урт хугацааны хэрэглээнд бага зэрэг давуу хэвээр байна гэж шинжээчид дүгнэжээ.
Эцсийн сонголт хэрэглэгчийн хэрэгцээнээс хамаарна
Хэрэв хэрэглэгч нэг төхөөрөмжөө олон жил ашиглах, дараа нь өндөр үнээр зарах, хурдан шинэчлэлт авахыг хүсвэл iPhone илүү найдвартай сонголт байж магадгүй.
Харин Samsung-ийн шинэ flagship-ууд ч долоон жилийн шинэчлэлт, хүчирхэг hardware, илүү нээлттэй Android орчин санал болгож байгаа тул хоёр брэндийн ялгаа өмнөх шигээ том биш болсон байна.
