Meta Platforms ирэх жил AI кулоныг дотооддоо туршиж, ухаалаг нүдний шилний цувралаа өргөжүүлэхээр төлөвлөж байна. Энэ талаар компанийн зүүдэг төхөөрөмж хариуцсан дэд ерөнхийлөгч Alex Himel-ийн дотоод санамж бичигт дурдсан бөгөөд уг баримт бичгийг The Information үзжээ. Энэхүү стратеги нь Reality Labs нэгжийн алдагдлыг бууруулах, компанийн AI бүтээгдэхүүнүүдийг илүү өргөн хүрээнд хөгжүүлэхэд чиглэж байна.
Дэлгэрэнгүй
Баримт бичигт Meta-ийн зүүдэг төхөөрөмжийн хөгжлийн гурван үндсэн чиглэлийг тодорхойлжээ. Үүнд AI кулон, өргөжүүлсэн ухаалаг нүдний шилний цуврал болон бизнесийн хэрэглээнд зориулсан Wearables for Work сегмент багтсан байна.
AI кулоныг компани 2027 оны хавар дотоод туршилтад оруулахаар төлөвлөж байна. Техникийн үзүүлэлтүүд нь одоогоор тодорхой болоогүй ч төхөөрөмж камер авч магадгүй аж.
Хоёр дахь чиглэл нь “супер мэдрэгчтэй” нүдний шилний хөгжүүлэлт юм. Ийм нүдний шил нь камер болон мэдрэгчүүдийг удаан хугацаанд тасралтгүй ажиллуулах боломжтой байхаар төлөвлөгдөж байна. Ингэснээр AI туслах хэрэглэгчийн өдрийн турш болсон үйл явдлыг шинжилж, жишээлбэл мартсан зүйл эсвэл худалдан авалтын талаар сануулах боломжтой болно.
Гурав дахь чиглэл нь бизнесийн хэрэглэгчдэд зориулан тохируулсан корпоратив зүүдэг төхөөрөмжүүд юм. Салбарын онцлогт тохирсон функцуудын ачаар эдгээр төхөөрөмж илүү өндөр ашигтай бүтээгдэхүүн болох боломжтой гэж үзэж байна.
Бүх төхөөрөмж Meta-ийн шинэ AI загвар болох Muse Spark болон Hatch AI агент дээр ажиллах аж. Мөн Meta 2026 оны хоёрдугаар хагаст 10 сая зүүдэг төхөөрөмж борлуулах зорилт тавьжээ.
Үүний зэрэгцээ компани Facebook, Instagram, WhatsApp болон ирээдүйн нүдний шилнүүдэд ашиглах боломжтой Meta AI-ийн төлбөртэй захиалгын монетизацийн загварыг хөгжүүлж байна. Одоогоор Meta One Plus сарын 7.99 ам.доллар, Meta One Premium сарын 19.99 ам.долларын хоёр тариф нэвтрүүлсэн бөгөөд эдгээр нь тооцоолол болон контент үүсгэх өргөтгөсөн боломжуудыг санал болгоно.
Нөхцөл байдал
AI төхөөрөмжийн зах зээлд өрсөлдөөн нэмэгдэж байна. OpenAI io Products-ийг худалдан авсныхаа дараа өөрийн гаджетын цуврал дээр ажиллаж байгаа бол Google Samsung болон Qualcomm-той хамтран ухаалаг нүдний шил хөгжүүлж байна.
Meta-ийн VR/AR төхөөрөмж болон зүүдэг гаджет хариуцдаг Reality Labs нэгж 2020 оны сүүлээс хойш 80 тэрбум ам.доллараас давсан үйл ажиллагааны алдагдал хуримтлуулжээ. 2024 онд тус нэгжийн алдагдал 17.7 тэрбум ам.доллар байсан бол 2025 оны эцсээр 19.2 тэрбум ам.доллар болж өссөн байна.
Гэсэн хэдий ч Ray-Ban Meta нүдний шил гэнэтийн арилжааны амжилт үзүүлжээ. Компани эдгээр нүдний шилийг EssilorLuxottica-тай хамтран Ray-Ban болон Oakley зэрэг брэндийн дор борлуулж байгаа ч цаашид бүтээгдэхүүний төрөл болон брэндүүдээ өргөжүүлэхээр төлөвлөж байна. EssilorLuxottica-ийн мэдээллээр 2025 онд Meta-ийн 7 сая гаруй AI нүдний шил борлогджээ. Mark Zuckerberg-ийн хэлснээр ийм төхөөрөмжийн хэрэглээ жилээс жилд гурав дахин өсөж байна.
2025 оны арванхоёрдугаар сард Meta яриа бичиж, түүний хураангуйг үүсгэдэг жижиг AI кулоноороо танигдсан Limitless стартапыг худалдан авсан. Хэлцлийн санхүүгийн нөхцөлийг нийтэд зарлаагүй бөгөөд Limitless шинэ хэрэглэгчдэд төхөөрөмж борлуулахaa зогсоож, технологио Meta-ийн экосистемд нэгтгэж эхэлсэн байна. Хэлцлээс өмнө стартап 33 сая ам.доллараас дээш хөрөнгө оруулалт татсан бөгөөд хөрөнгө оруулагчдын дунд Sam Altman болон First Round Capital венчур сан багтаж байжээ.
2026 онд Meta Reality Labs-ийн үйл ажиллагааны алдагдал 2025 оны түвшинд хадгалагдана гэж таамаглаж байна. Компанийн энэ оны хөрөнгө оруулалтын зардал 115–135 тэрбум ам.долларын хооронд төлөвлөгдсөн бөгөөд голчлон AI дэд бүтцийг хөгжүүлэхэд чиглэх аж.
